Nur-Sultanda dástúrli túrde jazda QR chempıonatynyń bastalýy qarsańynda ótetin hokeıden Qazaqstan kýbogynyń kezekti oıyny aıaqtaldy.
Bul joly bedeldi olja úshin elimizdiń óńirinen jınalǵan 11 klýb, sondaı-aq Ózbekstannan kelgen «Hýmo» komandasy saıysqa tústi. Toptyq kezeńniń jáne jartylaı fınaldyń qorytyndysy boıynsha aqtyq saıysta Qaraǵandydan kelgen, Qazaqstannyń qazirgi chempıony «Saryarqa» men Pro Hokei Ligasy maýsymynyń kúmis júldegeri kókshetaýlyq «Arlan» kezdesti, dep habarlaıdy Almaty-akshamy.kz.
Tartysty kúreste 3:0 esebimen qaraǵandylyqtar jeńiske jetti. Kýboktyń úzdik hokeıshileri qaqpashy Maksım Gráznov, qorǵaýshy Ivan Stepanenko (ekeýi de – «Arlan»), shabýylshy Andreı Lagýnov («Saryarqa») jáne jas oıynshy Vsevolod Logvın («Nomad») atandy.
«Hokeıshilerdi, jattyqtyrýshylar shtabyn, «Saryarqa» hokeı klýbynyń basshylyǵyn jáne jankúıerlerin Qazaqstan kýbogynyń fınalyndaǵy senimdi jeńisimen quttyqtaımyn. Úshinshi jyl qatarynan qaraǵandylyq klýb osynaý kýboktyń ıegeri atanyp otyr. Bul jeńis shyn máninde komandanyń týrnır boıy kórsetken jarqyn oıynynyń sátti nátıjesi. Fınaldyq oıyn - jankúıerler men osy sport túrin unatatyndar aıryqsha kútetin sheshýshi sát. Komandalarǵa sheksiz emosıa syılaǵany úshin alǵys aıtamyn», - dedi QR Mádenıet jáne sport mınıstri Dáýren Abaev.