Basty ózgeris – telearna endi «24 KZ» dep atalady.
«Habar 24» telearnasy aldaǵy 11-jeltoqsannan bastap jańa ataýmen jáne ózgeshe formatpen efırge shyǵady, dep habarlaıdy almaty-akshamy.kz «Habar» agenttiginiń baspasóz qyzmeti silteme jasap.
Sondaı-aq halyqqa eldegi jáne álemdegi jańalyqtardy jetkizýdiń tyń tásilderi engiziledi.
Aýdıtorıanyń suranysyna jáne Google Trends málimetterine qaraǵanda, telearnany ǵalamtordan izdegende «24 KZ» ataýy «Habar24»-ke qaraǵanda jıi qoldanylady. Sonymen qatar, bul eldik erekshelikti bildiretin mánge ıe. Qazaqstannyń telearnasy ekenin sheteldikter KZ belgisi arqyly birden tanı alady. Ózgergen logotıptegi zamanaýı estetıkalyq elementtiń ózindik mazmuny bar. Ondaǵy shýaǵyn shashyp, kóterilip kele jatqan kún belgisi jańa kúnniń bastalǵanyn beıneleıdi. Qaınaǵan tynymsyz tirshilik bastalyp, tolassyz aqparattar legi aǵytylady degenge saıady.
Kórermenge usynylatyn aqparattyń mazmuny men efırden berilý formasy telearnanyń shyǵarmashylyq sheberhanasyndaǵy basty ózgeris bolmaq. Jańalyqtar shyǵarylymdarynyń ýaqyty uzartylyp, eleýli oqıǵalar tereń jáne jan-jaqty taldanyp, saraptamalyq sıpaty basym bolady.
Sonymen qatar «24 KZ tańy»/«Ýtro 24 kz» tańǵy aqparattyq shoýy men «Prime Time» keshki qorytyndy aqparattyq-saraptamalyq baǵdarlamasy efırge shyǵady. Bul jobalar zamanaýı tehnologıamen jaraqtalǵan jańa stýdıadan beriledi.
Aımaqtyq jáne halyqaralyq tilshiler qosynyn kúsheıtken telearna jer jahannyń túkpir-túkpirinen tikeleı efırge qosylý arqyly eksklúzıvti aqparattar taratýǵa basymdyq beredi.
«Biz ýaqyt kóshinen qalmaýymyz kerek. Telearna aqparat taratqanda jedeldik pen obektıvtilik qaǵıdattaryn negizge alady. Qazaqstannyń basty aqparattyq telearnasyndaǵy ózgerister alǵa jyljýdyń jańa kezeńin aıǵaqtaıdy. Aqparat aıdynynda básekege qabiletti bolý - ýaqyt talaby. Sondyqtan, tórtkúl dúnıe jańalyǵyn jan-jaqty jetkizip, talǵamy bıik kórermenniń suranysyn qanaǵattandyrýǵa kúsh salamyz», - dedi «Habar» Agenttigi» AQ Basqarma Tóraǵasy Kemelbek Oıshybaev.
Esterińizge sala keteıik, telearna 2012 jyldyń 1 qyrkúıeginde alǵash ret efırge shyqty. Sodan bergi ýaqytta elimizdegi aqparattyq habar taratý salasynda jetekshi ról atqaryp keledi. «24 KZ» usynatyn efır materıaldary - 100% arnanyń óz ónimi.