Premer-Mınıstr Oljas Bektenovtiń tóraǵalyǵymen ótken Úkimet otyrysynda jumysshy mamandyqtary boıynsha kadr daıarlaý jáne olardyń biliktiligin jetildirý, sondaı-aq atalǵan kásipterdiń bedelin arttyrý jónindegi sharalar qaraldy.
Máselege qatysty oqý-aǵartý, ǵylym jáne joǵary bilim, eńbek jáne halyqty áleýmettik qorǵaý mınıstrleri baıandama jasady. Sondaı-aq «Atameken» UKP tóraǵasy Raıymbek Batalov jáne óńirlik kolej basshylary tyńdaldy, dep habarlaıdy aqshamnews.kz Úkimettiń resmı aqparattyq resýrsyna silteme jasap.
2025 jyl Jumysshy mamandyqtary jyly dep jarıalanyp, kásiptik-tehnıkalyq bilim berýdi eleýli túrde qaıta jańǵyrtý josparlanýda. Atalǵan ózgerister kadrlar daıarlaýǵa zamanaýı jaǵdaı jasaýǵa baǵyttalǵan. Búgingi tańda qazaqstandyq 772 kolejde 15 baǵyt boıynsha mamandar daıarlanýda. Jumysshy mamandyqtary boıynsha jumysqa ornalasý deńgeıi 70%-ǵa jetedi.
Úkimet basshysy ekonomıkanyń ornyqty ósýi men jańa óndiristerdi ashý kezinde elimizde bilikti jumysshylardyń jetispeıtinin atap ótti. bilikti kadrlar daıarlaý – memlekettik saıasattyń mańyzdy basymdyǵy bolyp qala bermek. Sondyqtan eńbek naryǵynyń, bıznestiń jáne bilim alýshy jastardyń múddeleri men qajettilikterin eskeretin júıeli sharalar keshenin ázirleý kerek.
Sońǵy jyldary kásiptik tehnıkalyq bilim berý júıesin damytýda birqatar progresıvti qadamdar jasaldy. Qazir kolejder jumysshy mamandyqtary boıynsha tegin oqytady, kadrlar daıarlaýǵa arnalǵan memlekettik tapsyrys kólemi aıtarlyqtaı ulǵaıtyldy. buǵan deıin kolejderge búdjet esebinen jyl saıyn 93 myńǵa jýyq stýdent qabyldanyp kelse, aǵymdaǵy jyly olardyń sany 142,5 myńǵa deıin jetti. Bıyl kolej stýdentteriniń stıpendıalary 50%-ǵa ósti. Sonymen qatar bilim berý uıymdarynyń materıaldy-tehnıkalyq bazasyn jaqsartý boıynsha jumystar jalǵasýda. «Jas maman» jobasy aıasynda 180 kolejdi qaıta jaraqtandyrý úshin respýblıkalyq búdjetten 48 mlrd teńge bólindi.
Premer-Mınıstr qabyldanǵan sharalarǵa qaramastan, kadr daıarlaýdaǵy áleýeti jetkilikti túrde ashylmaǵanyna – kásiptik-tehnıkalyq bilim berý júıesin jańǵyrtý qajettigine nazar aýdardy.
«Halyqaralyq salalyq standarttar men sertıfıkattaýdy belsendi túrde engizý qajet. Ol úshin Oqý-aǵartý mınıstrligi jumystyń sapasyna táýelsiz baǵalaý júrgizýi kerek. Sondaı-aq tehnologıalyq kóshbasshylardy aıqyndaı otyryp, kolejderdi kásibı beıimdeý men saralaýdy aıaqtaýy qajet», — dep atap ótti Oljas Bektenov. Bilim berý uıymdaryn yntalandyrý júıesi men belgilengen KPI kolejderdi oqý sapasyn arttyrýǵa talpyndyrady.
Negizgi mindet – tehnıkalyq jáne kásiptik bilim berýdi reformalaý boıynsha keshendi jospar ázirleý. Tıisti tapsyrma múddeli memlekettik organdarmen, ákimdiktermen, «Atameken» palatasymen birlese oryndaý úshin Oqý-aǵartý mınıstrligine berildi. Qujat kolejderdi tehnıkalyq jaǵynan qamtamasyz etý, oqytýshylar quramy men oqý baǵdarlamalaryna qoıylatyn talaptar, kolejderdiń jumys sapasyn baǵalaý jáne olardy qarjylandyrý baǵytynda naqty sharalardy qamtýy tıis.
Sondaı-aq Úkimet basshysy ýnıversıtetter men kolejderdiń bilim berý baǵdarlamalary arasyndaǵy sabaqtastyqty qamtamasyz etý qajettigin atap ótti. Búginde elimizdegi 30 jetekshi joǵary oqý orny sáıkes bilim berý baǵdarlamalaryn júzege asyratyn 100-den astam kolejdermen seriktestik ornatqan.
«Dýaldy oqytýdy belsendi damytyp, memlekettik tapsyrys sheńberinde kadrlardy naqty kásiporyndar úshin maqsatty daıarlaý júıesin keńeıtý qajet. Kolejder jastarymyz ben jumys berýshiler jáne ınvestorlar úshin «tartylys ortalyǵyna» aınalýǵa tıis», — dep atap ótti Oljas Bektenov.
Eńbek mınıstrligine «Atameken» palatasy salalyq memlekettik organdarmen birlesip, tıisti eýropalyq jikteýish negizinde Sıfrlyq daǵdylar bankin, al Ulttyq biliktilik júıesiniń sıfrlyq platformasy negizinde túlekterdiń jumysqa ornalasýyna járdemdesý úshin sertıfıkattalǵan kolej túlekteriniń tizilimin qurýtapsyryldy. Atalǵan sıfrlyq sheshimder túlekterdi jumysqa ornalastyrý prosesin jaqsartýǵa múmkindik beredi.
Sonymen qatar Premer-Mınıstr kásipkerlik blokty oqý úderisine tartýdyń jáne jumysshy kásipteri boıynsha kadrlar daıarlaýdyń mańyzdylyǵyn atap ótti.
«Álemdik tájirıbe kórsetip otyrǵandaı, kadr daıarlaý sapasy memleket, kásiporyndar men oqý oryndary arasyndaǵy jaýapkershiliktiń ara-jigin naqty bólý esebinen qamtamasyz etiledi. Sondyqtan biz bıznestiń osy prosestegi róli men belsendiligin arttyrǵymyz keledi. Bizdiń birlesken jumysymyzdaǵy eń basty maqsat – kolej túlekteri eńbek naryǵynda suranysqa ıe bolyp, laıyqty jalaqy alýy tıis», — dep tolyqtyrdy Oljas Bektenov.
Jumysshy mamandyqtarynyń mártebesin arttyrý jáne kásiptik-tehnıkalyq bilim berý júıesin damytý jónindegi jumys sheńberinde Oqý-aǵartý, Ǵylym jáne joǵary bilim mınıstrlikterine uqsas mamandyqtar boıynsha ýnıversıtetterde oqýyn jalǵastyryp jatqan kolej túlekterine arnalǵan granttar sanyn ulǵaıta otyryp, memlekettik tapsyrys qurylymyn qaıta qaraý tapsyryldy.