AES salýdy qoldaý jónindegi Halyqtyq shtab óńirlerde saılaýshylarmen kezdesý jumysyn bastady. Shtab músheleri aldymen Túrkistan oblysyna bardy.
Túrkistanda Halyqtyq shtab músheleri óńir aktıvimen júzdesip, oǵan 300-den astam adam qatysty. Májilis Spıkeri, «AMANAT» partıasynyń Tóraǵasy Erlan Qoshanov Shtab músheleri AES salýdyń mańyzy týraly azamattarmen ashyq áńgimelesý jáne osy jobany júzege asyrýǵa baılanysty jańa perspektıvalar týraly aıtý úshin óńirge kelgenin málimdedi.
Májilis Tóraǵasy túrkistandyqtar el Prezıdenti Qasym-Jomart Toqaevtyń qazaqstandyqtardyń ál-aýqatyn arttyrý jónindegi progresıvti bastamalary men saıasatyn árdaıym qoldap kele jatqanyn jetkizdi. Sondaı-aq, ol AES salý – elimizdiń energetıkalyq táýelsizdigi men qaýipsizdiginiń kepili ekenin aıryqsha atap ótti.
«Bizge taza, sarqylmas qýat kózderi kerek. Bir aqıqat bar: qazir atom energıasyna balama joq. Qazaqstanda atom elektr stansıasyn salý – búgingi kúnniń shyndyǵynan, búgingi kúnniń suranysynan týǵan bastama. AES ekonomıkanyń draıverine, qozǵaýshy kúshine aınalady. Joǵary bilikti jáne joǵary jalaqy tólenetin myńdaǵan jańa jumys oryndary paıda bolady. AES qurylysy onyń aınalasyndaǵy ınfraqurylymdy damytatyny aıtpasa da túsinikti: jańa joldar, mektepter, aýrýhanalar jáne turǵyn úıler salynady», – dedi ol.
Erlan Qoshanov elektr energıa tapshylyǵy búginde elimizdiń ońtústik óńirlerinde aıryqsha seziletinin atap ótti. Byltyrǵy qorytyndy boıynsha defısıt 3,1 mlrd kVt/saǵ qurady. Salystyrý úshin aıta ketsek, ortasha eseppen 100 myń turǵyny bar bir qala 700 mln kVt/saǵ tutynady. Elektr energıa jetispeýshiligi jańa óndiris oryndaryn ashýǵa, bıznesti, AÓK-ni damytýǵa, jańa jumys oryndaryn qurýǵa jáne tutastaı alǵanda elimizdegi ózge de salalardy damytýǵa kedergi keltiretin faktor bolyp otyr.
«AES salý ıdeıasy – myń oılanyp, myń tolǵanyp, qabyldanǵan sheshim. Bul – bizdiń energetıkalyq táýelsizdigimiz ben qaýipsizdigimizdiń kepili. Bizdiń shyn mánindegi arman-maqsatymyz – Prezıdent aıtqan dáýletti, derbes Qazaqstanda turý. Al, onyń oryndalýy osyndaı tarıhı qadamdardan bastalady», – dedi Májilis Tóraǵasy.