Qyrkúıektiń úshinshi jeksenbisinde Almatyda Qala kúni merekelenedi. Bıyl merekege oraı balalarmen qatar, eresekterge de qyzyqty bolatyn 150-den astam ártúrli formattaǵy is-shara josparlanǵan. Árbir is-shara óziniń stıli men mazmunyna qaraı «Almaty – bizdiń ortaq úıimiz», «Almaty – ásem qala», «Almaty – taza qala» uǵymy arqyly qala turǵyndary men qonaqtaryn biriktiredi, dep habarlaıdy aqshamnews.kz.
Mádenı-kópshilik sharalar ashyq aspan astynda Abaı atyndaǵy alańda (Respýblıka saraıynyń aldynda), Astana alańynda (QBTÝ aldynda), Arbatta, Tuńǵysh Prezıdent saıabaǵynda, M.Gandı atyndaǵy saıabaqta, «Alataý» teatrynyń aldyndaǵy alańda, «Kóktóbe» saıabaǵynda, Family Park saıabaǵynda, Gúlder saıabaǵynda jáne almatylyqtardyń súıikti demalys oryndaryna aınalǵan birneshe lokasıada ótedi. Olardyń basym deni halyqqa tegin uıymdastyrylady. Tek teatrlarda, Shapıto sırkinde nemese jabyq ǵımarattarda ótetin qoıylymdarǵa bılet alý qajet bolady.
Merekelik is-sharalar aıasynda orkestrler, teatr artıseri, tanymal ánshiler qala ishinde arnaıy avtobýspen júrip ótedi. Olar aıaldamalarǵa, kópqabatty úılerdiń aýlasyna jáne ashyq alańdarǵa toqtap, turǵyndardy performanspen tańǵaldyrady. Almatylyqtar men qala qonaqtary merekelik sharalarǵa aıaq astynan qatysyp qalýy múmkin, óıtkeni artıser júrip ótetin shyǵarmashylyq baǵyt aldyn ala habarlanbaıdy.
Sonymen qatar, Almaty kúnin toılaý kezinde qaladaǵy metro naǵyz óner alańyna aınalady. Munda jonglerler, akrobattar, sımfonıalyq jáne jaz orkestrleri óner kórsetedi. Metro beketterinde qala mýzeıleri, kitaphanalary jáne memlekettik arhıv uıymdastyrǵan úlken kórme ótedi. Jer asty kóliginiń jolaýshylary jol-jónekeı eksponattarmen tanysyp, áýezdi áýen tyńdap, qyzyqty kitaptar oqı alady.
Qaladaǵy ár aýdanda «úı mańyndaǵy saýyq-keshteri» uıymdastyrylady. Ashyq alańda úlken ekrandar ornatylyp, qala turǵyndary men qonaqtary keshki ýaqytta tarıhı, klasıkalyq jáne anımasıalyq fılmder tamashalap, karaokede án aıta alady. Jobaǵa belgili artıser de qatysyp, turǵyndarmen birge karaoke aıtady.
Almatylyqtar men qala qonaqtary túrli aýdıtorıaǵa baǵyttalǵan aýqymdy konsertter tamashalaı alady. Mysaly, klasıkalyq mýzyka áýesqoılary sımfonıalyq orkestrlerdiń qoıylymyn tamashalap, úlken shyǵarmashylyq ujymdardyń oryndaýyndaǵy saf ónerge kýá bolady. Jazsúıer qaýymǵa da arnaıy konsert uıymdastyrylady, al retro mýzyka áýesqoılary «Saǵyndym Almatymdy» syndy retro keshin tamashalaı alady.
Jalpy qyrkúıek aıynyń sońyna deıin aýqymdy mádenı baǵdarlama ázirlengen. Almatylyqtardy alǵashqylardyń biri bolyp «Dos-Muqasan» quttyqtaıdy. Aty ańyzǵa aınalǵan ansámbldiń konserti 11 qyrkúıekte saǵat 19:00-de «Alataý» dástúrli óner teatrynyń aldynda (Nurkent shaǵyn aýdany, 6) ótedi. Odan keıin dál osy alańda saǵat 20:00-de «Mýzart» tobynyń konserti bastalady. Kirý tegin.
Sonymen qatar, 11 qyrkúıek saǵat 19:00-de Arbatta «Almaty mahabbatym» atty teatrlandyrylǵan konsert ótedi. «Jańa ǵasyr» teatrynyń artıseri retro ánder men poezıa arqyly múzıkl janryndaǵy erkin shyǵarmashylyq atmosferaǵa bólemek.
12 qyrkúıekte «Alataý» dástúrli óner teatrynyń aldynda saǵat 18:00-de (Nurkent shaǵyn aýdany, 6) «Uly dala úni» konserttik baǵdarlamasy ótedi. Halyq aldynda Ulytau tanymal etno-rok toby óner kórsetedi. Shyǵarmashylyq ujym tyńdarmandardy zamanǵa saı óńdelgen tanymal kompozısıalarmen tańǵaldyrady. Ulytau — bul batys pen shyǵys mádenıetteriniń úılesimi, jáne álemde teńdesi joq aspaptyq joba. Skrıpkanyń áserli úni dombyranyń áýezdi motıvimen úılesip, elektrli gıtaradan ásem áýen bolyp tógiledi. Kirý tegin.
12-15 qyrkúıek aralyǵynda Panfılov kóshesindegi Arbatta saǵat 10:00-den 20:00-ge deıin Almaty kitaphanalary «Kitap oqýǵa saıahat» atty kvest ótkizedi. Sonymen qatar, 14-15 qyrkúıekte saǵat 11:00-den bastap Arbatta jyl saıynǵy «Kitap fest» festıvali ótedi.
Sondaı-aq, 12 qyrkúıekte saǵat 15:00-de Sh. Aımanov atyndaǵy «Qazaqfılm» ulttyq kınostýdıasynda kınostýdıanyń altyn qoryndaǵy fılmder kórsetiledi. Aıta keteıik, bıyl Sh.Aımanov atyndaǵy «Qazaqfılm» kınostýdıasynyń qurylǵanyna 90 jyl, al akter ári rejıser Sháken Aımanovtyń týǵanyna 110 jyl tolady.
13 qyrkúıekte saǵat 18:00-de «Alataý» dástúrli óner teatrynyń (Nurkent shaǵyn aýdany, 6) aldynda «Almaty keshi» atty teatrlandyrylǵan konsert ótedi, il-shala saǵat 19:30-da teatr artıseri «Qazaqsha terapıa» tobynyń qatysýymen «Ǵasyrlar úni» teatrlandyrylǵan konsert usynady. Kirý tegin.
Qala kúnine arnalǵan negizgi merekelik is-sharalar osy demalys kúnderi – 14 jáne 15 qyrkúıekte ótedi.
14 qyrkúıekte saǵat 18:00-de «Alataý» dástúrli óner teatrynyń aldynda (Nurkent shaǵyn aýdany, 6) Open Air Jaidarman ótedi. Ashyq aspan astyndaǵy konsertte qalanyń eń tanymal KTK komandalary óner kórsetip, umytylmas áser, qaǵytpa qaljyń, ádemi ázil usynady. Kirý tegin. Artynsha saǵat 20:00-de «Alataý» dástúrli óner teatrynyń aldynda (Nurkent shaǵyn aýdany, 6) «Án terbegen Almatym» retro keshi ótip, Aqbota Kerimbekova, Jubanysh Jeksen, Saltanat Baqaeva, Erbol Spalınov, Lashyn Muratqyzy, «Úsh qońyr» toby jáne teatr artıseri óner kórsetedi.
14 qyrkúıekte saǵat 16:00-de Astana alańynda LuxFM radıostansıasynyń festıvali ótip, oǵan Mıras Júginisov, Aıqyn Tólepbergen, Jazzdauren jáne Adam sıaqty tanymal artıser qatysady. Keshtiń basty qonaǵy – Gremmı syılyǵynyń ıegeri,prodúser DJ Imanbek.
Qala kúni, 15 qyrkúıekte saǵat 10:00-den 21:00-ge deıin Respýblıka saraıynyń aldyndaǵy Abaı alańynda «Almaty – bizdiń ortaq úıimiz» atty aýqymdy otbasylyq festıvál ótedi. Bul biregeı joba árbir otbasy múshesine qyzyqty bolmaq. Osy jerde saǵat 11:30-da «Almaty – arman qala!» estradalyq konserti ótedi, oǵan Jámılá Serkebaeva, Óktem Altaev, Qarakóz Súleımenova, Jubanysh Jeksenuly, Dıana Ismaılova, Muqasan Shahzada jáne basqa da tanymal artıser qatysady. Balalar men jasóspirimderge, sondaı-aq «TikTok» belsendi qoldanýshylaryna arnalǵan erekshe foto jáne vıdeo alańdary uıymdastyrylady. Festıvál aıasynda saǵat 19:00-de YOLO HOUSE, BIP HOUSE jáne basqa da tanymal tıktok juldyzdarynyń qatysýymen konsert ótedi.
Dástúr boıynsha 15 qyrkúıek kúni Tuńǵysh Prezıdent atyndaǵy saıabaqta saǵat 10:00-de jyl saıynǵy «Alma Fest» festıvali bastalady. Saıabaq aýmaǵynda konsertter, ashyq aspan astyndaǵy kınoteatr, kórmeler, qolónershiler jármeńkesi, alma sorttarynyń árbir túrin qamtıtyn jármeńke, balalar oıyn alańdary, fotoaımaqtar, sporttyq oıyndarǵa arnalǵan aımaqtar jáne t.b. uıymdastyrylady. Saıabaqta almatylyqtar kúni boıy otbasymen, dostarymen jáne qonaqtarymen merekelik atmosferany sezine alady. Dál osy saıabaqta 15 qyrkúıekte saǵat 16:30-da «Almaty – súıikti qalam» konserti ótip, megapolıs turǵyndary men qonaqtary úshin Roza Rymbaeva, Nurǵalı Núsipjanov, Baqtıar Taılaqbaev, Jubanysh Jeksen, Dıana Ismaılova jáne basqa da tanymal artıser óner kórsetedi.
15 qyrkúıek kúni saǵat 11:00-den bastap Arbatta «Týǵan kúnińmen, Almatym» festıvali ótip, qala turǵyndary men qonaqtary sýretshiler kórmesine, qolónershiler jármeńkesine, sheberlik dáristerine jáne basqa da is-sharalarǵa qatysa alady.
15 qyrkúıekte Astana alańynda saǵat 17:00-de estrada juldyzdarynyń qatysýymen Almaty Cover Show ótedi. Sahnada Naǵıma Esqalıeva, Meırambek Bespaev, Kalifarniya, RaiM, Nurlan men Murat, ARO, Erbolat Qudaıbergen, Qaırat Túntekov, Erkin Nurjanov, Aıdar Turǵanbaı jáne t.b. óner kórsetedi.
Sol kúni, 15 qyrkúıekte, qala kúnine oraı elimizdiń eń tanymal jas artısiń biri Sadraddın alǵash ret Ortalyq stadıonda jeke konsertin ótkizedi.
16 qyrkúıekte saǵat 18:00-de «Alataý» dástúrli óner teatrynda (Nurkent shaǵyn aýdany, 6) respýblıkalyq «Ulaǵat sózim urpaqqa» festıvali ótedi. Festıválge terme oryndaýshylary jáne eldiń ár óńirinen kelgen jyraýlar qatysady.
Sonymen qatar, 15-25 qyrkúıek aralyǵynda Qazaq memlekettik sırk artıseri Tuńǵysh Prezıdent saıabaǵynda shoý baǵdarlama usynyp, qala turǵyndary men qonaqtaryn qýantpaq. Bul úshin saıabaq aýmaǵynda alǵash ret Shapıto sırki ornatylady. Bul dıametri 13 metr bolatyn jyljymaly manej, onda sırk óneriniń barlyq janryndaǵy artıser óner kórsetedi. Shapıto kúmbeziniń bıiktigi 10 metrden asady, keshen 700 orynǵa eseptelgen jáne halyqaralyq standarttarǵa sáıkes keledi. Balalar men eresekter akrobattardyń, jonglerlerdiń, kloýndardyń jáne basqa da sırk artıseriniń erekshe qoıylymdaryn tamashalaı alady. 3000-4000 teńge aralyǵynda bıletti aldyn ala onlaın nemese Shapıto sırkiniń kireberisindegi kasadan satyp alýǵa bolady.
İs-sharalar josparynyń tolyq nusqasy Almaty qalasy ákimdiginiń saıtynda, sondaı-aq ákimdiktiń Instagram paraqshasynda, Almaty Mádenıet basqarmasy men aýdandyq ákimdikterdiń resmı paraqshalarynda jarıalanǵan. Eskerteıik, azdaǵan ózgerister bolýy múmkin. Aqparatty ákimdiktiń resmı ınternet-resýrstary arqyly baqylap otyrýdy suraımyz.
Sonymen qatar, merekelik is-sharalar qalanyń barlyq aýdandarynda ótedi:
-Áýezov aýdanynda «Almaty - súıikti qala» merekelik konserti 13 qyrkúıek kúni saǵat 11:00-de Family park demalys saıabaǵynda ótedi;
-Alataý aýdanynda «Almaty - meniń júregimde» merekelik konserti 14 qyrkúıek kúni saǵat 16:00-de «Alataý» DÓT aldynda ótedi;
-Almaly aýdanynda «Týǵan kúnińmen, Almaty!» 13 qyrkúıek kúni saǵat 15:00-de Gandı atyndaǵy saıabaqta ótedi;
-Bostandyq aýdanynda «Týǵan kúnińmen, Almaty!» 13-14 qyrkúıekte saǵat 16:00-de Mega Almaty SOO aýmaǵynda ótedi;
-Jetisý aýdanynda qala kúnin merekeleý 13 qyrkúıek kúni saǵat 18:00-de Qulager sh/a «Gúlder» saıabaǵynda ótedi;
-Naýryzbaı aýdanynda «Almaty - bizdiń ortaq úıimiz» merekelik konserti 14 qyrkúıek kúni saǵat 12:00-de Shuǵyla sh/a, 347 amfıteatr aýmaǵynda ótedi;
-Túrksib aýdanynda «Almaty - ásem qalam» negizgi aýdandyq konserti 14 qyrkúıek kúni saǵat 15:00-de №6 oqýshylar úıiniń skverinde kórkemóner ujymdarynyń, QR estrada juldyzdarynyń jáne Live band qatysýymen ótedi;
-Medeý aýdanynda «Týǵan kúnińmen, Almaty!» 14 qyrkúıek kúni saǵat 12:00-de Ortalyq mádenıet jáne demalys saıabaǵynda ótedi;