Qazaqstan elshiligi ustalǵan otandastarymyzdy sottyń qaraýynsyz deportasıalaý týraly kelisimge qol jetkizdi.
Bul týraly Syrtqy ister mınıstrliginiń resmı ókili Aıbek Smadıarov málim etti, dep habarlaıdy Almaty-akshamy.kz Ulysmedia.kz-ke silteme jasap.
«Bıyl naýryz aıynyń sońynda Irak Respýblıkasynyń quqyq qorǵaý organdary zańsyz eńbek qyzmetin júzege asyrǵany úshin Qazaqstannyń 20 azamatyn ustady. Qazaqstannyń Iordanıadaǵy jáne Iraktaǵy elshiligi jergilikti organdarmen sot qaraýynsyz deportasıalaý týraly ýaǵdalastyqqa qol jetkizdi. Qazir ustalǵan azamattar aıyppul tólep Iran aýmaǵynan shyǵyp ketti», - dedi SİM ókili.
Onyń aıtýynsha, jyl basynda da osyǵan uqsas oqıǵa bolǵan.
«Bıyl aqpanda Qazaqstannyń 7 azamaty Irak Respýblıkasynyń sheteldikterdiń bolýy týraly zańynyń normalaryn buzǵany týraly, atap aıtqanda, jasyryn kazınoda zańsyz eńbek etkeni úshin tergeýge tartylǵan bolatyn. Bizge málim bolǵandaı, ótken jyldyń qarasha aıynda olardyń 5-eýi ustalyp, sot qaraýyna deıin kepilmen bosatylǵan. Osyǵan qaramastan jerlesterimiz Irakka qaıta oralyp, eldiń zańnamasyn qaıtadan buzdy. Qazaqstan elshiligi shuǵyl kómek kórsetýdi uıymdastyrǵan. Sondaı-aq, sot jáne prokýratýramen kelissózder ótkizildi», - deıdi ol.
A.Smadıarov joǵaryda atalǵan zańbuzýshylyq úshin Irak zańnamasy boıynsha bir jylǵa deıin bas bostandyǵynan aırylýy nemese 500 myńnan 3 mln ırak dınaryna deıin aıyppul salynýy múmkin ekenin atap ótti.