Bıyl Ázirbaıjanda Qazaqstannyń mádenıet kúnderi ótedi.
Bul týraly elimizge resmı saparmen kelgen Ázirbaıjan Prezıdenti Ilham Álıevpen keńeıtilgen quramdaǵy kezdesý barysynda Memleket basshysy Qasym-Jomart Toqaev aıtty, dep habarlaıdy Almaty-akshamy.kz QazAqparatqa silteme jasap.
«Eki eldiń mádenı onkúndikterin ótkizý týraly ýaǵdalastyqty aıryqsha atap ótkim keledi. Qazaqstannyń mádenı kúnderi osy jyldyń ishinde ótedi. Búgin biz Ázirbaıjannyń qurmetti Prezıdentimen kórnekti memleket qaıratkeri Geıdar Álıevtiń atyndaǵy kósheni ashamyz. Bul is-sharany ázirbaıjan halqynyń uly perzentiniń 100 jyldyǵyna oraılastyryp otyrmyz», - dedi Memleket basshysy.
Qasym-Jomart Toqaev búgin Geıdar Álıevtiń ómirine arnalǵan «Ǵazız ǵumyr» derekti fılminiń tanystyrylymy ótetindigin aıtty. Fılmdi Qazaqstan teleradıokorporasıasy túsirgen.
«Elderimizdiń dostyǵy men ózara qoldaýynyń jarqyn dáleliniń biri - qazaq halqynyń Ázirbaıjanǵa – Fezýlı qalasynda Qurmanǵazy atyndaǵy balalar shyǵarmashylyǵy ortalyǵyn syıǵa tartýy bolmaq. Maǵan atalǵan ortalyqtyń qurylysy barynsha jyldam qarqynmen júrgizilip jatqanyn aıtty. Menińshe, taıaý arada osynaý mańyzdy nysannyń jumys isteı bastaǵanyn kóremiz. Biz munan ary da jan-jaqty gýmanıtarlyq baılanysty damytýǵa, ortaq rýhanı qundylyqtardyń asyl qazynasyn baıytýǵa nyq nıettimiz», - dedi Prezıdent.