Bilim berý salasyndaǵy sapany qamtamasyz etý komıteti bilim berý uıymdaryna monıtorıń jasady.
Onyń barysynda 40 mekteptiń lısenzıasyz jumys istegeni anyqtaldy. Onyń ishinde 30 memlekettik jáne 10 jekemenshik mektep bar, dep habarlaıdy Almaty-akshamy.kz Oqý-aǵartý mınıstrligine silteme jasap.
Lısenzıasyz jumys istegen mektepterdiń deni Astana, Almaty qalalary men Batys Qazaqstan, Almaty, Jambyl, Jetisý jáne Mańǵystaý oblystarynda. 32 mektepke qatysty ákimshilik is qozǵalyp, lısenzıasyz qyzmet úshin aıyppul salyndy. Onyń 23-i memlekettik, 9-y jekemenshik mektep.
«Lısenzıanyń joqtyǵy mekteptiń sáıkestik tekserýinen ótpegenin nemese ruqsat alý úshin qujattar tapsyrmaǵanyn bildiredi.Onnan asa mektepte sanıtarlyq-epıdemıologıalyq qorytyndy jáne tótenshe jaǵdaı aktileri joq. Bul balalardyń densaýlyǵy men jaılylyǵyna qaýip týdyrýy múmkin. 14 mektepte materıaldyq-tehnıkalyq baza bilim berýdiń zamanaýı talaptaryna saı kelmeıdi, bilim berý ınfraqurylymy, bilikti pedagogıkalyq kadrlarmen tolyq jabdyqtalmaǵan, uıymdastyrý jumystary da durys jolǵa qoıylmaǵan bul bilim berý sapasyn keri áserin tıgizedi», - dedi komıtettiń ruqsat berý saıasaty basqarmasynyń basshysy Juldyz Áýezhanova.
Aıta keteıik, lısenzıasy joq mektepter bilim týraly memlekettik úlgidegi qujattardy, ıaǵnı negizgi jáne jalpy orta bilim týraly atestattardy bere almaıdy. Lısenzıasyz jumys isteıtin barlyq mektepterge qatysty ákimshilik ister qozǵaldy. Búgingi tańda aýmaqtyq departamentterge lısenzıasy joq mektepterge qatysty tıisti sharalar qabyldaý tapsyryldy, óńirlerdiń ákimdikterine tıisti hattar joldandy.