N. Gýmılev atyndaǵy Eýrazıa ulttyq ýnıversıtetiniń arheolog-ǵalymdary Eýrazıa dalasynda kezdespeıtin iri kólemdegi qola dáýiriniń dala pıramıdasyn tapty, dep habarlaıdy Almaty-akshamy.kz.
Bul týraly Ýnıversıtettiń baspasóz qyzmeti habarlaǵan.
Qazba jumystary Abaı oblysynda júrgizilýde. 2014 jyldan bastap EUÝ tarıh fakúlteti arheologıa jáne etnologıa kafedrasynyń ǵalymdary Abaı oblysy, Abaı aýdany Toqtamys eldi mekeniniń janyndaǵy Qyryqúńgir keshendi eskertkishinde arheologıalyq qazba jumystaryn júrgizip keledi. Oǵan ýnıversıtet stýdentteri men magıstranttary atsalysty. Júrgizilgen zertteý jumystarynyń nátıjesinde Eýrazıa dalasynda kezdespeıtin iri kólemdegi bizdiń dáýirimizge deıingi ekinshi myńjyldyqtyń basy, ıaǵnı osydan tórt myń jyl burynǵy qola dáýiriniń dala pıramıdasy tabyldy.
«Dala pıramıdasy óte dáldikpen salynǵan, alty qyrly. Árbir qyrynyń arasy on úsh metr jáne segiz qatar taspen qalanǵan. Ortasynda birneshe sheńberleri bar. Bul - óte kúrdeli keshendi qurylys. Sol keshendegi qurylystyń syrtyndaǵy qabyrǵalarynda ártúrli janýarlardyń, ásirese jylqynyń sýretteri basym beınelengen. Sonymen birge túıeniń de beıneleri bar. Qazbadan tabylǵan málimetter, qysh ydystar, áıel adamnyń altyn syrǵasy jáne taǵy basqa áshekeı buıymdar osy qola dáýiriniń úlken kóne dáýirde mádenıeti, oshaǵy bolǵandyǵyn kórsetedi. Bul, ıaǵnı, sol kezeńniń ózinde jylqy kúltiniń óte joǵary bolǵandyǵyn sol tas qurylystyń aınalasyndaǵy jylqy súıekteriniń tabylýy dáleldep otyr», - deıdi tarıhshy ǵalym, EUÝ arheologıa jáne etnologıa kafedrasynyń meńgerýshisi Ulan Úmitqalıev.
Onyń aıtýynsha, qazirgi ýaqytta zertteýler sheteldik ǵalymdarmen birlesip júrgizilýde.