«Boıymdy oryndyqqa shyǵyp ólshedi»
Shyǵys Qazaqstan oblysy Aıagóz qalasynda Otan aldyndaǵy boryshyn ótep júrgen Dmıtrıı Shapýlovtyń boıy – 2 metr. Atyraý qalasynan kelgen jigit tank áskerı bólimine qabyldanǵan. Dmıtrıı boıynyń uzyndyǵy áskerı ortada esh yńǵaısyzdyq týdyrmaıtynyn, kerisinshe basymdyq beretinin aıtty dep habarlaıdy Almaty-akshamy.kz QazAqparatqa silteme jasap.
Dmıtrıı Shapýlov qasyndaǵy sarbazdar arasynda boıshańdyǵymen birden kózge túsedi. 45-shi ólshemdegi aıaq-kıim kıetin sarbazdyń áskerı boryshyn óteýge kelgenine eki aı bolǵan. Shymyr deneli, shıraq qımyldaıtyn jigit óz ortasynda erekshelenip júredi. Óz sózinde ol boıynyń uzyndyǵy áskerı ortada esh yńǵaısyzdyq týdyrmaıtynyn, kerisinshe sport normatıvterin oryndaý men jaýyngerlik daıyndyqta qarýmen atý kezinde paıdasyn tıgizetinin aıtty.
«Aıagóz qalasyndaǵy tank áskerı bóliminiń motoatqyshtar batalónynda boryshymdy ótep júrmin. Osynda Atyraý qalasynan keldim. Boıym mektep qabyrǵasynan bastap jyldam óse bastaǵan», – deıdi Dmıtrıı.
Jasy nebári on toǵyzdaǵy jaýyngerdiń boıy – 2 metr. Boıy mektepte de, kolejde de eń uzyn bolypty. Basketbol oınaıtyny da bar.
«Ákemniń boıy – 197 santımetr. Sol kisige tartqan shyǵarmyn. Al anamnyń boıy alasa. Jalpy boıymnyń uzyn bolǵany ózime unaıdy. Oǵan bola esh alańdamaımyn», – deıdi Dmıtrıı Shapýlov.
Dmıtrıı áskerı bólimge alǵash medısınalyq tekserýden ótýge kelgen shaǵynda medbıkeler onyń boıy ólsheıtin quraldan asyp túskenin aıtypty. Artynsha amalyn taýyp oryndyqtyń ústine shyǵyp ólshegen.
Qatardaǵy jaýynger áskerge kelgenine esh ókinbeıdi. Áskerı qyzmetti barlyq er azamat mindetti túrde óteýi tıis dep sanaıdy.