Baıqaýǵa elimizdiń 14 óńirinen júzden astam aýyldyq okrýg ákimderi ótinish bergen
Alǵadaı Jambyl Qazaqstannyń úzdik aýyl ákimi boldy, dep habarlaıdy Almaty-akshamy.kz Memlekettik qyzmet isteri agenttigine silteme jasap.
Batys Qazaqstan oblysy Tasqala aýdany Shejin aýyldyq okrýginiń ákimi Alǵadaı Jambyl osy aýdanda týyp-ósken, mamandyǵy – muǵalim.
Ol eńbek jolyn Tasqala aýdanynda bastaǵan, 2019 jyly memlekettik qyzmetke ornalasqan.
Konkýrstyń respýblıkalyq kezeńinde ol et jáne sút ónimderin qaıta óńdeý jáne aýyl sharýashylyǵy kooperatıvterin júzege asyrý arqyly qosymsha jumys oryndaryn qurýǵa baǵyttalǵan jobasyn qorǵady.
Ekinshi oryndy Jambyl oblysy Jambyl aýdany Polatqosshy aýyl okrýginiń ákimi Erjan Danaev jáne Túrkistan oblysy Tólebı aýdany Joǵarǵy Aqsý aýyl okrýginiń ákimi Ábdiqadyr Sıqymbaev, úshinshi oryndy Pavlodar oblysy Jelezın aýdany Bashmachın aýyl okrýginiń ákimi Merýert Madaǵulova men Almaty oblysy Panfılov aýdany Aıdarly aýyl okrýginiń ákimi Aıdar Isaev aldy.
Sonymen birge Qaraǵandy oblysy Aqtoǵaı aýdany Tasaral aýyl okrýginiń ákimi Nýrjan Seıtov «Úzdik sharýashyl ákim», Aqmola oblysy Stepnogorsk qalasy Aqsý kentiniń ákimi Marat Smaǵulov «Ashyq ákim», Qyzylorda oblysy Jalaǵash aýdany Aqsý aýyl okrýginiń ákimi Qanat Nıetqulov «Úzdik áleýmettik joba» nomınasıasyn ıelendi.
Konkýrs jeńimpazy «Úzdik aýyl ákimi» statýetkasymen, sonymen birge ártúrli nomınasıa ıegerleri Memlekettik qyzmet isteri agenttigi tóraǵasynyń qurmet gramotalarymen marapattalady.
Konkýrsqa qatysý úshin elimizdiń 14 óńirinen júzden astam aýyldyq okrýg ákimderi ótinish bergen. Konkýrsqa Túrkistan oblysynan 21 ákim, Batys Qazaqstan oblysynan 15 ákim jáne Jambyl oblysynan 14 ákim qatysqan.