Keıingi ýaqytta ushaqqa minemin dep mýzykalyq aspaptaryn syndyryp alý jaǵdaılary jıilegen.
Ásirese, estrada ókilderi áleýmettik jelide jazyp, narazylyq bildirýde. Iaǵnı, dombyrasyn nemese gıtarasyn júk salǵyshqa salyp, keıin qıraǵan kúıi alyp jatyr, dep habarlaıdy Almaty-akshamy.kz Qazaqstan.tv saıtyna silteme jasap.
«Endi ne isteımiz?» degen jyrmen tanylǵan Aısholpan endi ne isterin bilmeı júr. Ushaqqa minemin dep, dombyrasyn ekinshi ret syndyryp alǵan.
«Biz syndyrmaı ózińizge tapsyrýǵa ýáde beremiz dep dombyrama áınek degendi jabystyryp berdi. Almatyda dombyramdy kútip alǵanda synyp shyqty moıyny. Dombyram mln turady. Endi ony óteı ma, ótemeı me, bir qudaı biledi», - deıdi aıtysker aqyn Aısholpan Tóleýtaı.
Ándi áýeletýge arnalǵan aspaptaryn áýege ákete almaǵandardyń biri – ánshi, Roza Álqoja. Ol da áýe kompanıalardyń talap-shartyna narazy.
«Astanadan-SHymkentke ushaıyn desek, dombyra men gıtarany alýǵa bolmaıdy deıdi qolǵa. Dombyrany alaıyq, syıady ǵoı desek, joq bizde ondaı zań joq, júkke ótkizesizder deıdi. Qalaı desek, dombyraǵa 7 myń, gıtaraǵa 7 myń tóle deıdi», - deıdi ánshi Roza Álqoja.
Ushaqqa júkti qabyldaý tártibi ár jerde ártúrli. Negizgi aıyrmashylyq – aspaptyń kóleminde.
«Gıtara, dombyra sıaqty aspaptardy qol júgi retinde rásimdeýge bolady. Arnaıy fýtlár ishinde bolǵany abzal. Eger mýzykalyq aspap vıolonchel sıaqty úlken bolsa, jolaýshy bılet alar kezde qosymsha aspaby úshin qosymsha oryn alý kerek», - deıdi áýe kompanıasynyń menedjeri Elvıra Nurbaeva.
Jalpy, elimizdegi áýe kompanıalaryna júkti, onyń ishinde mýzykalyq aspaptardy tasymaldaýǵa qatysty ortaq talap nemes zań joq. Ár kompanıa ushaqtarynyń tehnıkalyq múmkindikterine qaraı óz betinshe sheshim qabyldaıdy.
«Eger tasymaldaý kezinde jolaýshy qandaı da bir aqaýdy anyqtaǵan jaǵdaıda, sol mezette avıakompanıanyń ókilimen birge júktiń aqaýy týraly tıisti aktini toltyrý kerek. Sol qujattyń negizinde shyǵyndaryn talap etýge quqyǵy bar», - deıdi QR Indýstrıa jáne ınfraqurylymdyq damý mınıstrligi Halyqaralyq áýe qatynasyn retteý basqarmasynyń basshysy Ádilet Kóbenov.