Kelesi jyldan bastap elimizde áýe kóligine bılet quny arzandaıdy.
Bul týraly Indýstrıa jáne ınfraqurylymdyq damý mınıstri Qaıyrbek Óskenbaev aıtty, dep habarlaıdy Almaty-akshamy.kz QazAqparatqa silteme jasap.
Senattyń jalpy otyrysynda jýrnalıser Qazaqstanda áýe bıletteriniń nege qymbat ekenin surady.
«Baǵa belgileýdiń dınamıkalyq júıesi bar. Úsh aı buryn satyp alsańyz, bılet 12-15 myń, qazir satyp alsańyz, 50-60 myń, odan da joǵary bolýy múmkin», - dep jaýap berdi Qaıyrbek Óskenbaev.
Sondaı-aq ol Qazaqstannyń arzan avıakompanıalardy tartý baǵytynda atqarylyp jatqan jumystary jóninde aıtty.
«Qazir tıisti jumystar atqarylyp jatyr. Bizde ulttyq operator segmenti bar, sondaı-aq loýkoster segmenti eskerilgen. Atap aıtqanda, «ashyq aspan» rejımi aıasynda jolaýshylardy tasymaldaýǵa qatysty tıisti ruqsat tásilderin engizemiz. Máselen, loýkosterler bir elden ushyp kelip, bizdiń el arqyly basqa memleketke saparlaı alady, ıaǵnı Eýropaǵa nemese Túrkıaǵa áýe kóligimen barý múmkindigi qamtylmaq. Loýkoster bolǵandyqtan, bılet quny áldeqaıda arzan bolady. Bul qadamdardy kelesi jyldan bastap iske asyrý josparlanyp otyr», - dedi mınıstr.
Ol loýkoster áýekompanıalarynyń qyzmeti basqasha bolatynyn, biraq qazaqstandyqtar álem moıyndaǵan áýe kompanıalarynda usha alatynyn túsindirdi.