Sport ǵylymy men sporttyq medısınaǵa basa kóńil bólý mańyzdy.
Almatydaǵy Qazaq ulttyq agrarlyq zertteý ýnıversıtetinde 5-shi Dúnıejúzilik kóshpendiler oıyndaryna daıyndyq aıasynda «QR-da at sporty men ulttyq jylqy sharýashylyǵynyń qazirgi jaǵdaıy men damý perspektıvalary» atty dóńgelek ústel ótti, dep habarlaıdy Almaty-akshamy.kz
Dóńgelek ústelge Ulttyq Ǵylym akademıasynyń prezıdenti, Qazaq ulttyq agrarlyq zertteý ýnıversıtetiniń rektory Aqylbek Kúrishbaev, Ulttyq sport qaýymdastyǵynyń prezıdenti Islambek Saljanov, Májilis depýtaty Amanjol Áltaı, sondaı-aq Týrızm jáne sport mınıstrliginiń, Aýyl sharýashylyǵy mınıstrliginiń, ǵylymı qoǵamdastyqtyń, sport klýbtarynyń, Ulttyq sport qaýymdastyǵynyń ókilderi jáne onyń quramyna kiretin federasıalardyń basshylary men atbegiler qatysty.
İs-shara barysynda Qazaqstanda sporttyq jylqy sharýashylyǵyn damytý, at sporty men ulttyq sport túrlerinen mamandar daıarlaý máseleleri talqylandy.
Ulttyq sport qaýymdastyǵynyń basshysy Islambek Saljanov ulttyq sport salasyn retteý máselelerine jeke toqtalyp, Qazaqstanda osyǵan deıin bul salany retteıtin birde-bir zań qabyldanbaǵanyn atap ótti.
«Ulttyq sport qaýymdastyǵy Parlament Májilisiniń depýtattarymen birge Ulttyq sport týraly zań jobasyn ázirleý bastamasyn kóterip otyr. Onyń aıasynda Qazaqstanda etnosportty damytý úshin júıeli qoldaý sharalary kózdeledi», – dedi Islambek Saljanov.
Qazir memleket basshysynyń tapsyrmasy boıynsha qaýymdastyq Qazaqstan Respýblıkasynda Ulttyq sportty damytýdyń 2024-2029 jyldarǵa arnalǵan tujyrymdamasynyń jobasyn ázirlep jatyr. Onda ulttyq sport túrlerin damytý máseleleri jáne olardy sheshý joldary kórsetilip, is-qımyl jospary men nysanaly ındıkatorlary usynylady.