Premer-Mınıstr Álıhan Smaıylov Úkimet otyrysynda geologıa salasyndaǵy problemalardy atady.
Onyń aıtýynsha, qazir barlyq ken orny tekserilip jatyr. Óz mindettemesin oryndamaıtyn jer qoınaýyn paıdalanýshy kompanıalardan lısenzıa alynyp, kelisimshart buzylyp jatyr, dep habarlaıdy Almaty-akshamy.kz QazAqparatqa silteme jasap.
«Metaldardyń jekelegen túri boıynsha álemde jetekshi orynǵa ıe bolǵanmen, shıkizat bazasynyń aıtarlyqtaı tómendegenin baıqap otyrmyz. Mysaly, hrom, alúmını, myrysh, mys, qorǵasyn qory azaıyp keledi. Joǵary tehnologıalyq ónimder óndirisiniń negizi bolatyn sırek jer metaldaryn barlaý báseńdegen. Biz áli kúnge deıin birinshi ótinim prınsıpi boıynsha lısenzıa alǵan jańa kompanıalardyń naqty jumysyn kórmedik», - dedi Á.Smaıylov búgingi Úkimet otyrysynda.
Oǵan qosa, jer qoınaýyn zertteýdiń ǵylymı bazasy men ınfraqurylymy barynsha jańartýdy talap etedi.
Investorlardy odan ári tartýǵa qajetti geologıalyq aqparatty sıfrlandyrý jumystary da aıaqtalǵan joq. Bilikti geologtar men geodezıst mamandar tapshy.
«12 jylda geologıalyq barlaý jumystaryn júrgizýge 2 trln teńgeden astam jeke ınvestısıa salyndy. Biraq soǵan qaramastan, biz jańa ken oryndaryn barlaýǵa jumsalatyn salymdar boıynsha artta qalyp otyrmyz. Atalǵan problemalardy sheshý úshin qoldanystaǵy zańnamaǵa tıisti ózgerister qabyldandy», - deıdi Úkimet basshysy.
Premer-Mınıstr Indýstrıa mınıstrligine resýrstyq bazany ulǵaıtý, sırek kezdesetin jáne sırek jer metaldar negizinde joǵary tehnologıalyq ónimder óndirisin uıymdastyrý úshin jol kartasyn ázirleýdi tapsyrdy.
Energetıka mınıstrligine «Samuryq-Qazyna» qorymen birge 2 aıda zamanaýı tehnologıalyq sheshimderdi paıdalanyp, gazdy ken oryndarynyń tarıhı derekterine taldaý júrgizý júkteldi.
«Indýstrıa, Ǵylym jáne Energetıka mınıstrlikteri jyl sońyna deıin ǵylymı baza men ınfraqurylymǵa taldaý júrgizýi kerek. Nátıjesi boıynsha olardy damytý jónindegi tıisti is-sharalar josparyn ázirleýi qajet. Sıfrlyq damý, Indýstrıa jáne Energetıka mınıstrlikteri jyl sońyna deıin tarıhı derekterdiń barlyq túrine keshendi taldaý júrgizip, onlaın-platformany barynsha toltyrýy kerek. Indýstrıa jáne Energetıka mınıstrligi josyqsyz jer qoınaýyn paıdalanýshylarǵa sharalar qabyldap, jyl sońyna deıin barlyq ken ornyn tekserýdi aıaqtasyn», - dedi Álıhan Smaıylov.