Osylaı degen prezıdent sheteldegi qazaqstandyq ǵalymdardy elge shaqyrý usynysyn qoldady.
Otandastarymyzdy óz zertteýlerin Qazaqstanda jalǵastyrýǵa shaqyramyn, dedi prezıdent Qasym-Jomart Toqaev ǵylym jáne tehnologıalar jónindegi ulttyq keńestiń otyrysynda, dep habarlaıdy Almaty-akshamy.kz
"Búgingi jıynda sheteldik ǵylymı ortalyqtarda tabysty jumys istep júrgen ǵalymdarymyzdy Qazaqstanǵa qaıtarý mańyzdy degen pikir aıtyldy. Bul usynysty qoldaımyn jáne otandastarymyzdy óz zertteýlerin Qazaqstanda jalǵastyrýǵa shaqyramyn. Memleket óz tarapynan mundaı ǵalymdarǵa uıymdastyrýshylyq turǵydan jáne qarjylaı naqty kómek kórsetedi. Shetelde jumys isteıtin ǵalymdardy buǵan deıin de shaqyrǵanbyz. Osy máseleni muqıat oılastyrý kerek", - dedi prezıdent.
Memleket basshysynyń sózinshe, ǵylym óziniń aýqymy men sıpaty jaǵynan jahandyq deńgeıde bolǵandyqtan bul jerde jalań patrıotızmge berilý orynsyz. Áıtse de Qazaqstan aqyl-oıdyń jahandyq básinen tys qalmaýy kerek, dedi ol.
"Óte bilimdi adamdar, suranysqa ıe ǵalymdar jaqsy jalaqy, zertteýge qolaıly jaǵdaı izdep nemese jaı ǵana jańa tájirıbe úshin basqa memleketterge jıi qonys aýdarady. Myqty ǵalymdardyń kelýi elimizdiń damýyna tyń serpin beredi ári adamı kapıtaldyń sapasyn aıtarlyqtaı jaqsartýǵa yqpal etedi. Muny álemdik tájirıbe anyq kórsetip otyr", - dedi prezıdent.
Qasym-Jomart Toqaevtyń aıtýynsha, halyqaralyq tájirıbeni jan-jaqty zerttep, shetelden bilikti mamandar men ǵalymdardy tartý maqsatynda barlyq múmkindikti qarastyrǵan jón.
"Ol úshin elimizde tabysty eńbek etýge qolaıly jaǵdaı jasaý kerek. Jalpy, memleket, ǵylymı qoǵamdastyq jáne bıznes arasyndaǵy jasampaz seriktestik otandyq ǵylymdy órge súıreıtin negizgi shart ekenine senimdimin", - dedi memleket basshysy.