Qosymsha gıdrologıalyq beketter ashylady
Úkimette QR Premer-Mınıstri Álıhan Smaıylovtyń tóraǵalyǵymen ótken keńeste Sý resýrstaryn basqarý júıesin damytýdyń 2023-2029 jyldarǵa arnalǵan tujyrymdamasynyń jobasy qaraldy, dep habarlaıdy Almaty-akshamy.kz.
Ekologıa jáne tabıǵı resýrstar mınıstri Zúlfıa Súleımenovanyń aıtýynsha, qujattyń maqsaty eldiń sý resýrstaryn saqtaý jáne utymdy paıdalaný, ekonomıka jáne qorshaǵan orta salalarynyń qajettilikterin teńgerimdi qamtamasyz etý máselelerin sheshý bolyp tabylady.
«Biz sý ekojúıeleriniń retteý jáne qoldaý fýnksıalaryn saqtaý úshin olardyń uzaq merzimdi turaqtylyǵyn qamtamasyz etpekpiz. Tujyrymdama jobasy tórt negizgi mindetti qamtıdy: ónimdilikti, sý sapasyn, qolaısyz áserlerge tózimdilikti arttyrý jáne sý resýrstaryn basqarýdy jetildirý», — dedi Z. Súleımenova.
2029 jylǵa qaraı Qazaqstanda magıstraldyq jáne sharýashylyqaralyq arnalar jelisi jańǵyrtylyp, avtomattandyrylady, barlyq negizgi gıdrotehnıkalyq qurylystarǵa kópfýnksıonaldy tekserý júrgiziledi dep josparlanýda.
Budan basqa, qosymsha gıdrologıalyq beketter ashylady, sýmen jabdyqtaýǵa tarıfter qaıta qaralady jáne sýdy aǵyzý monıtorıńiniń avtomattandyrylǵan júıesi engiziledi.
Talqylaý qorytyndysy boıynsha Tujyrymdama jobasy maquldandy. Premer-Mınıstr Álıhan Smaıylov salalyq vedomstvoǵa aıtylǵan usynystardy eskere otyryp, qujatty pysyqtaýdy tapsyrdy.