Qazirgi kezde Alakól aýdanynda turǵyn úı kezeginde 1511 adam tur
Úsharal qalasynda «Nurly jer» baǵdarlamasymen salynǵan bes qabatty 20 páterlik 2 turǵyn úı paıdalanýǵa berildi. Úı kezeginde turǵandar, sonyń ishinde, kóp balaly otbasylar, ata-anasynyń qamqorlyǵynsyz qalǵan balalar, halyqtyń basqa da áleýmettik áljýaz toptary kópten kútken qýanyshqa keneldi, dep habarlaıdy Almaty-akshamy.kz Jetisý oblysy ákiminiń baspasóz qyzmetine silteme jasap.
Qazirgi kezde Alakól aýdanynda turǵyn úı kezeginde 1511 adam tur. Solardyń ishindegi 40 adam salynyp bitken eki turǵyn úı páterleriniń kiltin qoldaryna aldy. Jańa qonys ıelerin qýanyshtarymen quttyqtaǵan aýdan ákimi Almas Ábdınov jýyq arada Úsharal qalasynda taǵy bir 60 páterlik jalgerlik úı salynatynyn aıtty.
İske qosylǵan kóp qabatty úılerdiń qurylysy 2021 jyldyń mamyr aıynda bastalyp, ótken jyldyń qańtar aıynda aıaqtalǵan bolatyn. Qurylys-montaj jumystaryn «Baǵaly – Alakól» JSHS merdiger kompanıasy júrgizdi. Úılerde eki jáne úsh bólmeli páterler sany 10-nan, bir bólmeli páter sany - 20.
Jalpy, Jetisý oblysynda turǵyn úı salý jumystary josparly túrde júrgizilýde. Ótken jyly 295 myń sharshy metr turǵyn úı boı kótergen. Bıyl da qurylystyń osy qarqyny saqtalady, atap aıtqanda, búdjet qarjysyna 161,9 myń sharshy metr, sol sıaqty komersıalyq turǵyn úı 21,1 myń sharshy metr salynady.