QR Sý resýrstary jáne ırrıgasıa mınıstri Nurjan Nurjigitov Japonıanyń Qazaqstandaǵy Tótenshe jáne Ókiletti Elshisi Djýn Iamadamen kezdesti.
Taraptar otandyq sý salasyn damytý baǵytyndaǵy yntymaqtastyq múmkindikterin talqylady, dep habarlaıdy Almaty-akshamy.kz Sý resýrstary jáne ırrıgasıa mınıstrligine silteme jasap.
Elshi sý resýrstaryn paıdalaný jáne basqarý máselelerimen aınalysatyn jeke mınıstrlik qurý basqa memleketter úshin úlgi bolatyn óte mańyzdy jáne durys qadam ekenin atap ótti.
Sondaı-aq Iamada myrza Japonıanyń Qazaqstanmen uzaq merzimdi jáne tolyqqandy yntymaqtastyqqa múddeli ekenin málimdedi. Al sý tehnologıalary salasynda jumys isteıtin japon kompanıalary elimizde óz jobalaryn iske asyrýǵa, atap aıtqanda, sýdy qaıta paıdalaný baǵytynda seriktestik ornatýǵa nıetti ekenin aıtty. Elshi QR Sý resýrstary jáne ırrıgasıa mınıstrligi men japondyq kásipkerler arasynda baılanys ornatýǵa járdemdesýge daıyn ekenin bildirdi.
Óz kezeginde Nurjan Nurjigitov mınıstrlik Japonıanyń sý salasyn avtomattandyrý jáne sıfrlandyrý boıynsha tájirıbesin zertteýge nıetti ekenin atap ótti, sondaı-aq japondyq sarapshylar men ǵalymdardy tartý arqyly qazaqstandyq mamandardyń biliktiligin arttyrý úshin birlesip jumys isteýdi usyndy.
Sonymen qatar, mınıstr elimizde sý aıdyndaryn tazartý tehnologıalaryna suranys joǵary ekenin aıtyp, Japonıadaǵy eń iri Bıva kólin tazartýdy mysalǵa keltirdi. Sondaı-aq, Nurjan Nurjigitov japondyq muhıttanýshy ǵalymdardy Kaspıı teńiziniń ǵylymı-zertteý ınstıtýtymen birlesip jumys isteýge shaqyrdy.
Kezdesý qorytyndysy boıynsha taraptar yntymaqtastyqtyń múmkindigi zor baǵyttaryn talqylaýdy jalǵastyrýǵa kelisti.
«Halyqaralyq yntymaqtastyq – bizdiń mınıstrlik jumysynyń negizgi baǵyttarynyń biri. Sebebi, Qazaqstan transshekaralyq ózenderge táýeldi. Alaıda, biz kórshilermen ǵana emes, basqa memlekettermen de baılanys ornatýǵa daıynbyz. Olardyń tájirıbesin qabyldaýǵa, birlesken jobalardy iske asyrýǵa jáne zamanaýı tehnologıalardy engizýge nıettimiz. Bizdiń Japonıamen yntymaqtastyǵymyz berik ári nátıjeli bolady dep úmittenemiz»,
– dedi Sý resýrstary jáne ırrıgasıa mınıstri Nurjan Nurjigitov.