QR Áleýmettik kodeksiniń kúshine enýimen osy jyldyń 1 shildesinde elimizde quzyretine múgedektigi bar adamdardy áleýmettik qorǵaý, arnaýly áleýmettik qyzmetter kórsetý jáne áleýmettik qamsyzdandyrý salasyndaǵy zańnamanyń saqtalýyn baqylaýdy júzege asyrý kiretin memlekettik áleýmettik qorǵaý ınspektorlary ınstıtýty engizildi.
Osy kezeńde áleýmettik ınspektorlar 851 tekserý júrgizdi, onyń 434-i profılaktıkalyq baqylaý sheńberinde, 417-si jospardan tys tekserýler boldy, dep habarlaıdy Almaty-akshamy.kz cala mınıstrligine silteme jasap.
Memlekettik baqylaýmen: 303 memlekettik mekeme jáne jergilikti atqarýshy organdardyń oblystyq, aýdandyq bólimderi; 247 mektep, kolejder men balabaqshalar; 69 arnaýly áleýmettik qyzmetter kórsetý ortalyǵy; 29 dúken; 29 saýda ortalyqtary, saýda úıleri men sýpermarketter; 15 sanatorıı; 101 emhana, aýrýhanalar men dárihanalar; 8 balalar úıi men sábıler úıleri; 7 halyqqa qyzmet kórsetý ortalyǵy; 2 bank fılıaly; 6 Qazposhta jáne Qazaqtelekom bólimsheleri; 7 JSHS; 4 sport uıymy; 4 sottar; 5 kafe; 2 shashtaraz; 1 kitaphana; 1 murajaı jáne t. b. qamtyldy.
Máselen, Eńbek jáne áleýmettik qorǵaý komıtetiniń Shyǵys Qazaqstan oblysy boıynsha departamenti Óskemen qalasynyń mamandandyrylǵan balalar úıinde múgedektigi bar adamdarǵa qoljetimdilikti qamtamasyz etý máselesi boıynsha jospardan tys tekserý júrgizdi. Tekserý nátıjeleri boıynsha laýazymdy adamdarǵa anyqtalǵan buzýshylyqtardy joıý týraly nusqama berilip, sondaı-aq ákimshilik jaýapkershilik sharalary qabyldandy.
Eńbek jáne áleýmettik qorǵaý komıtetiniń Batys Qazaqstan oblysy boıynsha departamenti Krýgloozernyı arnaýly áleýmettik qyzmet kórsetý ortalyǵyna jospardan tys tekserý júrgizdi. Tekserý barysynda qyzmet kórsetý sapasy boıynsha buzýshylyqtar anyqtaldy, ortalyq basshylyǵy ákimshilik jaýapkershilikke tartyldy, anyqtalǵan buzýshylyqtardy joıý týraly nusqama berildi.
QR EHÁQM Eńbek jáne áleýmettik qorǵaý komıtetiniń aýmaqtyq departamentteri 2023 jyldyń 9 aıynda 1 268 tekserý júrgizdi, anyqtalǵan buzýshylyqtardy joıý týraly 875 uıǵarym berip, jalpy somasy 74 mln teńgeden astam somaǵa 338 aıyppul saldy.