Qazaqstan halyq partıasy fraksıasynyń basshysy Magerram Magerramov óziniń depýtattyq saýalynda áskerdegi ólim, qoǵamdaǵy álimjettik pen zorlyq jasaý, buzaqylyq jaıttarynyń tamyry mektepten taraǵanyn jetkizdi, dep habarlaıdy aqshamnews.kz.
Onyń pikirinshe qazir elimizdiń bilim ordalaryndaǵy tártiptik jumysty qaıta qarap, úlken ózgerister engizý kerek. Depýtattyń aıtýynsha, jaıly jáne qaýipsiz ómir mektepten bastalady. Alaıda, elimizdegi mektepterde jaılylyq pen qaýipsizdik bar-joǵy jaıynda suraq týyndatady.
«Qazaqstandyqtardy kámeletke tolmaǵan balalar arasyndaǵy zorlaý, uryp-soǵýy jáne ólim týraly jańalyqtary jaǵa ustatýda. Partıamyz keń taralǵan zorlyq-zombylyqtyń, ásker qataryndaǵy ólimniń, deni saý jáne myqty jigitterdi múgedektik pen ólimge ákeletin jazataıym oqıǵalardyń negizgi mektepte tamyr jaıǵan buzaqylyq, zorlyq-zombylyq, bandıtızm men qylmystyq ómir salttyń kórinisi dep sanaıdy. Áskerge mektepte destrýktıvti ortada tárbıelengen balalar keledi. Olar ózderiniń qylmystyq áreketterin sonda jalǵastyrýda», - dedi Magerram Magerramov.
Depýtattyń aıtýynsha mektep balany qoǵamǵa ıntegrasıalaý prosesiniń alǵashqy qadamy ekenin eskerýi kerek.
«Zorlyq - zombylyqty túbimen joıý kerek. Biraq búgingi kúni agresorlar, jasyna baılanysty jazasyz qalýda. Bálkim, biz zań shyǵarýshylar, Ulybrıtanıa sıaqty qylmystyq jaýapkershilikke tartýdy 14 jastan emes, 12 jastan bastap qaıta qaraýymyz kerek shyǵar. Mundaı jaýapkershilikti ásirese zorlyq jasaý isterine belgileý qajet. Ýákiletti organ bilim berý prosesine ǵana emes, sonymen qatar balalardyń moraldyq-etıkalyq minez-qulqyna, emosıonaldy-psıhologıalyq turaqtylyǵyna erekshe nazar aýdarýy kerek», - dedi ol.
Osy tusta Magerram Magerramov Mádenıet jáne aqparat mınıstrliginiń naqty jumysynyń joqtyǵyn synady.
«Olar balalar men jasóspirimderdiń ómiri men densaýlyǵyn dáıekti jáne senimdi qorǵaýǵa baǵyttalǵan ata-ana, otbasy ınstıtýtynyń álsireýine jol berip otyr. Bul máselede halyqaralyq tájirıbege júginý kerek. Mysaly, Japonıada bilim mınıstrligi býllıngke qarsy arnaıy keńes qurdy. Onyń qyzmeti eresekterdiń balalar úshin qaýipsiz orta qurý jaýapkershiligin arttyrýǵa baǵyttalǵan. Munda muǵalimderden býllıngtiń ár jaǵdaıyna barynsha muqıat qaraý, psıhologtardan balalardyń psıhoemosıonaldy jaǵdaıyn kásibı qoldaý, al ata-analar men qamqorshylardan munyń aldyn alý úshin memlekettik júıemen belsendi yntymaqtastyq talap etiledi. Biz kámeletke tolmaǵandardy quqyqtyq tárbıeleýdiń profılaktıkanyń erekshe ádisin qaraýdy usynamyz. Ol úshin bilim berý, ishki ister jáne ádilet organdary mekteptiń aqparattyq bazasyn qamtamasyz etýi kerek», - dep qorytty ol.