Qazaqstan ulttyq quramasynyń sportshylary Dúnıejúzilik kóshpendiler oıyndarynyń tórtinshi jarys kúninde 6 altyn, 7 kúmis, 8 qola júlde jeńip aldy. Jalpy esepte Qazaqstan qorjynynda 27 altyn, 17 kúmis, 25 qola júlde bar, dep habarlaıdy aqshamnews.kz.
Kókpardan Qazaqstan ulttyq quramasy Reseıdi 18-2 esebimen jeńip, fınalǵa shyqty. Aqtyq oıynda Qyrǵyzstannan kelgen kókparshylarmen kezdesedi. Jarys «Qazanat» ıpodromynda ótedi.
Kók bórúden Qazaqstan komandasy Túrkıa quramasyn 15-1 esebimen jeńip, fınalǵa joldama aldy. Fınalda qazaqstandyq sportshylar Qyrǵyzstan komandasymen kezdesip, altyn júldeni sarapqa salady.
Ipodrom mańynda etnoaýylda jamby atýdan sońǵy jarys kúni ótti. Jamby stılinen Batyr Beksaýyt kúmis júldege ıe boldy. Ulttyq qurama sportshylary jalpy eki altyn, eki kúmis, eki qola ıelenip, komandalyq esepte birinshi orynǵa jaıǵasty.
Etnoaýylda powerful nomad sportynan absolútti salmaq dárejesinde Azamat Maqulbekov altyn júlde aldy. Ol 16 elden kelgen 16 sportshynyń ishinen úzdik nátıje kórsetti.
«Arǵymaq» at-sport kesheninde ótip jatqan dástúrli sadaq atýdan úshinshi jarys kúninde sadaqshylar «Jamby» nysanasy boıynsha synǵa tústi. Jánibek Qulmyrzaev pen Baqbergen Sálimov qola júldege ıe boldy. Dástúrli sadaq atýdan jarystyń alǵashqy kúni «Pýta» nysanasy boıynsha Aıkórkem Batıhan men Qasymhan Qanat qola júlde alsa, Jánbek Qulmyrzaev altyn medal ıelendi.
Al «Qalqan» nysanasynan ótken básekede Erbol Tápenov kúmis júldege, Qasymhan Qanat qola júldege ıe boldy.
Jaqsylyq Úshkempirov atyndaǵy Jekpe-jek saraıynda qyrǵyzdyń ulttyq belbeý kúresi alyshtan jarys aıaqtaldy. Erler arasynda 60 keli salmaq dárejesinde Turmahanbek Qalmuqan jáne 100 keli salmaq dárejesinde Bekbol Nurlanuly kúmis júlde aldy. Nurjan Sársenǵalıev (70 keli) pen Nurdáýlet Jarylǵapov (+100 keli) qola júldege ıe boldy. Áıelder arasynda 75 kelide Perızat Jaqypbekova kúmis júldege ıe bolsa, 55 kelide Nazerke Ábiltaeva, 60 kelide Araılym Rakısh jánk 65 kelide Aınur Aqjigitova qola júlde aldy.
«Alaý» muz saraıynda arqan tartystan jarys ótti. Qazaqstan erler quramasy da, áıelder quramasy da fınalda reseılik sportshylarǵa jol berdi. Osylaısha kúmis júldege ıe boldy.
«Alaý» muz saraıynda erler arasynda asyq atý men áıelder arasynda bes asyqtan fınaldyq oıyndar ótti. Asyq atýdan erler quramasy Qyrǵyzstan quramasyn jeńip, altyn júldege ıe boldy.
Bes asyq saıysynda Qazaqstan áıelder quramasy Reseıden basym túsip, altyn júlde aldy.
«Dýman» qonaq úıi jáne sport kesheninde toǵyzqumalaqtan fınaldyq oıyndar ótti. Ulttyq qurama sportshylary jekeleı synda eki altyn, bir kúmis, bir qolaǵa qol jetkizdi. Komandalyq esepte altyn medal aldy. Qyzdar arasynda Móldir Serikqyzy chempıon atansa, Ańsaǵan Qojanásip kúmis júlde enshiledi. Erler arasynda Beksultan Bostandyqov altyn alsa, Ersultan Áýelbaı qola júldeni qanaǵat tutty.