Ortalyqqa oqýshylar ata-analar kómekke júgine alady.
Memleket basshysynyń tapsyrmasyna sáıkes elimizdiń ár óńirinde psıhologıalyq qoldaý ortalyǵyn ashý jumystary júrgizilip jatyr, dep habarlaıdy Almaty-akshamy.kz
Mundaı ortalyqtar 17 óńirde ashyldy. Oqý-aǵartý mınıstrligi psıhologıalyq qoldaý ortalyqtaryn damytý arqyly pedagog-psıhologterdiń áleýetin arttyrý boıynsha jumystar júrgizip jatyr.
Atalǵan ortalyqtardyń basty maqsaty — jergilikti jerlerde balalardyń, ata-analar men pedagogtardyń psıhologıalyq ál-aýqatyn nyǵaıtýǵa jáne saqtaýǵa baǵyttalǵan biryńǵaı psıhologıalyq qyzmet júıesin qurý.
Ortalyqtardyń qyzmetin birizdendirý úshin Mınıstrlik ádistemelik usynymdar ázirledi. Bul usynymdar óńirlerde ortalyqtardy balalar úshin jaıly jaǵdaı jasalǵan biryńǵaı úlgide ashýǵa septigin tıgizedi. Onda ortalyqtyń mindetteri, negizgi qyzmet baǵyttary, usynylatyn shtat kestesi, ár mamannyń laýazymdyq nusqaýlyqtary týraly aqparat qamtylǵan. Jeke taraý materıaldyq-tehnıkalyq jabdyqtaýǵa arnalǵan, – dedi Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.
Ortalyqtar oblystyń pedagog-psıhologteri úshin bir-birimen tájirıbe almasatyn, ádistemelik keńes alatyn tirekke, sondaı-aq oqýshylar men olardyń ata-analary kómek alý úshin júginetin orynǵa aınalady. Jyl sońyna deıin qalǵan oblystarda da ortalyqtar tolyqtaı ashylady dep josparlanyp otyr.
Aıta ketsek, ortalyqtar ashý boıynsha is-shara Balalardy zorlyq-zombylyqtan qorǵaý, sýısıdtiń aldyn alý jáne olardyń quqyqtary men salamattylyǵyn qamtamasyz etý jónindegi 2023-2025 jyldarǵa arnalǵan keshendi josparda kózdelgen.