Monıtorıń 26 sáýir men 11 mamyr aralyǵynda bolady.
Bıyl bilim alýshylardyń bilim jetistikteriniń monıtorıńin ótkizý kezinde akademıalyq adaldyq qaǵıdattarynyń saqtalýyn baqylaý úshin Oqý-aǵartý mınıstrliginiń qyzmetkerleri, Bilim berý salasyndaǵy sapany qamtamasyz etý komıtetiniń aýmaqtyq departamentteri, «Órleý» biliktilikti arttyrý ulttyq ortalyǵy jáne pedagogıkalyq joǵary oqý oryndarynyń qyzmetkerleri tartyldy, dep habarlaıdy Almaty-akshamy.kz Elorda.info-ǵa silteme jasap.
Ótkizý formaty halyqaralyq zertteýler sekildi standart boıynsha ár aýdıtorıada test-ákimshiler bolady.
Bilim berý salasyndaǵy sapany qamtamasyz etý komıtetiniń Bilim salasyndaǵy sapany qamtamasyz etý saıasaty basqarmasynyń basshysy Dınara Ábilqanovanyń aıtýynsha, monıtorıń fýnksıonaldyq saýattylyq deńgeıin baǵalaýǵa jáne alǵan bilimderin mektep qabyrǵasynda jáne ómirlik jaǵdaılarda qoldana bilýge baǵyttalǵan.
«Bilim sapasy týraly naqty derek alý úshin kóptegen elder bilim alýshylardyń oqý jetistikterin ulttyq deńgeıde únemi baǵalap otyrady. Osylaısha, mańyzdy suraqtarǵa jaýap alady. Oqytý qanshalyqty júıelengen? Oqýshylardyń bilim alý deńgeıi qandaı jáne olar qoǵamǵa enýge qanshalyqty daıyn? Mine, osy suraqtarǵa jaýap alý bizdiń bilim berý júıemiz úshin de mańyzdy. Tek BBJM-niń obektıvti nátıjeleri ǵana durys qorytyndy jasaýǵa jáne tıisti sheshimder qabyldaýǵa múmkindik beredi», - deıdi basqarma basshysy.
Testileý memlekettik baqylaý nysany emes. Sondaı-aq bilim alýshy, bilim berý uıymdary úshin de quqyqtyq saldary joq.
BBJM-ge 4 jáne 9-synyptardan 50 myńnan astam oqýshysy qatysady. 1 472 mektepte úsh baǵyt boıynsha kompúterlik keshendi testileý túrinde ótedi. Ol oqý, matematıkalyq jáne jaratylystaný saýattylyǵy. Monıtorıń 26 sáýir men 11 mamyr aralyǵynda bolady.