QR Eńbek jáne halyqty áleýmettik qorǵaý mınıstrliginiń Memlekettik eńbek ınspeksıasy komıtetiniń málimetteri boıynsha, 2025 jyldyń basynan beri óndiristegi jazataıym oqıǵalardyń saldarynan 293 jumysker zardap shegip, olardyń 40-y qaza tapqan, dep habarlaıdy aqshamnews.kz.
Bul rette osy jyldyń İ toqsanynyń qorytyndysy boıynsha óndiristik jaraqattaný 2024 jyldyń sáıkes kezeńimen salystyrǵanda 16,8% - ǵa tómendedi.
2025 jyldyń İ toqsanynyń qorytyndysy boıynsha óndiristik jaraqattaný deńgeıi (1000 jumys jasaýshyǵa shaqqanda jazataıym oqıǵalar jıiliginiń koefısıenti) 0,04 qurady.
Jaraqattanýdyń joǵary deńgeıi elimizdiń ónerkásiptik aımaqtarynda saqtalýda. Máselen, Qaraǵandy oblysynda – 31, Qostanaı oblysynda – 27, Shyǵys Qazaqstan oblysynda – 24, Aqtóbe oblysynda – 22, Atyraý oblysynda – 22, Almaty qalasynda – 19 adam zardap shekti.
Ekonomıka salalary bólinisinde zardap shekkenderdiń eń kóp sany taý-ken metalýrgıa kesheniniń kásiporyndarynda – 15,3% jáne qurylys salasynda – 12% baıqalady.
Jazataıym oqıǵalarǵa ákep soqqan negizgi sebepter: jumys óndirisin qanaǵattanarlyqsyz uıymdastyrý (34,4%); jábirlenýshiniń óziniń óreskel abaısyzdyǵy (32%); jol júris erejelerin buzý (8,4%); eńbek qaýipsizdigi jáne eńbekti qorǵaý qaǵıdalaryn buzý (7,6%) boldy.
Qaýipsiz eńbek jaǵdaılaryn jasaý jáne óndiristik jaraqattanýdy azaıtý - Úkimet pen QR Eńbek jáne halyqty áleýmettik qorǵaý mınıstrliginiń negizgi mindetteriniń biri.
Sońǵy bes jyl ishinde eńbekti qorǵaý salasynda memlekettik organdar men jumys berýshiler qabyldaǵan keshendi sharalar óndiristik jaraqattaný deńgeıin 6,3%-ǵa tómendetýge múmkindik berdi.
Elimizdiń 3262 kásiporny buzýshylyqtardyń aldyn alý jáne boldyrmaý maqsatynda eńbek qaýipsizdigi jáne eńbekti qorǵaý standarttaryn engizdi.
2019 jyldan bastap Eńbekmıni «Nóldik jaraqat – Vision Zero» tujyrymdamasyn ilgeriletý boıynsha belsendi jumys júrgizýde. Búginde oǵan 605 kásiporyn qosyldy.
Qurylys obektilerinde bas merdigerdiń obektidegi eńbek qaýipsizdigi máseleleri boıynsha barlyq qosalqy merdigerlerge jaýapkershiligi men baqylaýyn kózdeıtin baqylaýdyń tikeleı modelin engizý boıynsha jumys jalǵasýda. Bul baqylaý modelin respýblıkanyń 318 kásiporny engizdi.
Budan basqa jumys berýshilerge eńbekti qorǵaý talaptarynyń saqtalýyn ózin-ózi tekserýden ótýge múmkindik beretin «Onlaın eńbek keńesshisi» elektrondyq servısi iske qosyldy. Servıs iske qosylǵan sátten bastap ony 41 090 jumys berýshi paıdalandy.
Qazaqstan Respýblıkasynyń 2024-2030 jyldarǵa arnalǵan qaýipsiz eńbek tujyrymdamasy iske asyrylýda, ol 4 negizgi baǵytty kózdeıdi. Bul táýekelge baǵdarlanǵan tásil negizinde eńbekti qorǵaýdyń ulttyq júıesin jańǵyrtý, jumys oryndarynda táýekeldi tómendetý jónindegi sharalardy ekonomıkalyq yntalandyrý, kásibı quzyrettilikter men ǵylymı áleýetti damytý, sondaı-aq eńbekti qorǵaý salasyndaǵy baqylaý men monıtorıńtiń tıimdiligin arttyrý. Tujyrymdamany iske asyrý óndiristik jaraqattaný men kásiptik syrqattanýshylyq deńgeıin tómendetýge yqpal etetin bolady.