Oqý-aǵartý mınıstrligi bul baǵytta qoldaý sharalaryn pysyqtap jatyr. Sonymen qatar qarajatty birden bóbekjaılarǵa emes, ár balanyń derbes shotyna aýdarý boıynsha pılottyq joba engizildi.
Elde 11 600-den astam mektepke deıingi bilim berý uıymy bar. Onyń jartysynan kóbi – jeke mekemeler. Ákimshilik aýmaq pen ekologıalyq jaǵdaıǵa qaraı bóbekjaılarǵa memleket esebinen ár bala úshin 53 myńnan 62 myń teńgege deıin aýdarylady. Al ata-analar óńir ákimderi bekitken áleýmettik azyq-túlik jıyntyǵynyń aqysyn tólep júr. Budan bylaı mektepke deıingi uıymdardy qarjylandyrý tetigi túbegeıli ózgeredi. Prezıdent Joldaýynda júktelgen jańa mindetterdiń biri – osy.
"Áleýmettik osal topqa jatatyn otbasylardyń balalary tegin tamaqpen qamtylǵan. Búgingi tańda bilim berý uıymdarynda 97 myńnan astam osyndaı bala tegin tamaqpen qamtamasyz etilgen. Endi osynyń jalǵasy retinde ári qaraı kómek qajet etetin otbasylar memleketten kóbirek qoldaý kóretindeı mehanızmmen qaıta qarastyrý usynylǵan. Sondyqtan qazir osy jumystar bastalyp ta ketti", - deıdi QR Oqý-aǵartý mınıstrligi Mektepke deıingi bilim berý departamentiniń dırektory Manara Adamova.
Sondaı-aq Taraz qalasynda derbestendirilgen qarjylandyrý ádisi synalyp jatyr. Pılottyq joba boıynsha memleket esebinen beriletin tólem bóbekjaılarǵa emes, ár balanyń shotyna aýdarylady.
"Ár balanyń ata-anasynyń balabaqshany tańdaý múmkindiginiń bolýy, birinshiden. Ekinshi – qarajatty balanyń esepshotyna aýdarý. Iaǵnı ata-ana ekinshi deńgeıli bankten esepshot ashady. Sol jerden balanyń atyna qarajat túsedi. Ol qarajatty eshkim paıdalana almaıdy, eshqaıda jumsaı almaıdy. Tek qana tańdaǵan balabaqshaǵa aýdarý múmkin. Iaǵnı maqsatty túrde jumsalady", - dedi QR Oqý-aǵartý mınıstrligi Mektepke deıingi bilim berý departamentiniń dırektory.
Pılottyq joba jyl sońyna deıin Shymkent, Túrkistan qalalarynda da engiziledi. Oń nátıje berse, el boıynsha júzege asyrý josparlanyp otyr.