Kóshi-qon zańnamasyn buzýdyń jolyn kesý úshin 11 naýryzdan bastap elimizde “Mıgrant” jedel-profılaktıkalyq is-sharasy ótkizilip jatyr.
Polısıa sheteldikterdiń turatyn jerlerin, qurylys obektilerin, bazarlardy, jaldamaly jumysshylardy paıdalanatyn uıymdardy jáne jumys berýshilerdi tekserýde. Operasıanyń eki kúninde kóshi-qon zańnamasyn buzýdyń 3093 deregi anyqtaldy, dep habarlaıdy Almaty-akshamy.kz Polisia.kz-ke silteme jasap.
207 jumys berýshi sheteldik jumys kúshin zańsyz paıdalanǵany úshin, sondaı-aq polısıany ózderine kelgen sheteldikter týraly ýaqtyly habardar etpegeni úshin 1117 jeke jáne zańdy tulǵa jaýapqa tartyldy. Kóshi-qon zańnamasyn buzýshylardy elimizden shyǵaryp jiberý týraly 344 sot sheshimi shyǵaryldy. 39 sheteldik el aýmaǵynan májbúrlep shyǵaryldy. Olar endi Qazaqstanǵa bes jylǵa deıin kire almaıdy. Kóshi-qon ahýalyn taldaý barysynda sheteldikterdiń elimizge zańdy túrde kiretini, tek keı jaǵdaıda kóshi-qon zańnamasyn buzýshylar sanatyna aýysatyny jáne buǵan Qazaqstan azamattarynyń kómektesetini anyqtaldy.
Quqyq buzýshylyqtardyń edáýir bóligi sheteldikterdi tıisti qujattarsyz jumysqa tartýmen baılanysty. Mysaly, Túrkistan oblysynda mektep salýmen zańsyz aınalysqan 20 sheteldik anyqtaldy. Mańǵystaý oblysynyń tas kenishinde ruqsat qujattarynsyz jumys istegen Ózbekstannyń 36 azamaty anyqtaldy. Osyǵan uqsas faktiler Almaty, Shymkent qalalarynda, Aqtóbe, Almaty, Atyraý, Shyǵys Qazaqstan jáne Soltústik Qazaqstan oblystarynda áshkerelendi. Barlyq quqyq buzýshylar jaýapqa tartyldy.
Jambyl oblysynda alty sheteldik azamatqa Qyrǵyzstannan zańsyz kóshi-qon arnasyn uıymdastyrǵan eki qazaqstandyq azamat anyqtaldy. Osy fakti boıynsha sotqa deıingi tergep-tekserý júrgizilýde. Almaty qalasynda Afrıka kontınentinen kelgen eki áıeldiń zańsyz bodı-massaj jasaýmen aınalysqany anyqtaldy. Budan bólek eki kún ishinde izdeýde júrgen 19 sheteldik qylmysker quryqtaldy, olar bizdiń elimizde jasyrynbaq bolǵan. Sonymen qatar polısıa memlekettik shekarany zańsyz kesip ótý jáne elde zańsyz bolý boıynsha segiz faktini anyqtady. Kóshi-qon zańnamasyn buzýshylyqtardyń aldyn alý jáne anyqtaý boıynsha jumys jalǵasatyn bolady.
Aqparat kózi Polisia.kz saıtynda: https://polisia.kz/qazaqstanda-migrant-zhedel-profilaktikalyq-is-sharasy-otkizilip-zhatyr/