QR Eńbek jáne halyqty áleýmettik qorǵaý mınıstri Svetlana Jaqypova Batys Qazaqstan oblysyna jumys sapary aıasynda «Zenıt» Oral zaýyty» AQ eńbek ujymymen kezdesý ótkizdi.
Ol eńbek jaǵdaılary zıandy jumystarda uzaq ýaqyt boıy jumys istegen qazaqstandyqtarǵa arnalǵan arnaýly áleýmettik tólem jáne 2030 jylǵa deıingi qaýipsiz eńbek tujyrymdamasy týraly baıandady.
Katerler, kemeler jáne munaı-gaz sektorynda jumys isteıtin kompanıalarǵa arnalǵan jabdyqtar óndirýge mamandanǵan kásiporynda 788 adam jumys isteıdi, ortasha jalaqysy 250 myń teńgeni quraıdy. Ujymmen kezdesý barysynda Svetlana Jaqypova uzaq ýaqyt boıy eńbek jaǵdaılary zıandy jumysta istegen adamdardy áleýmettik qorǵaý deńgeıin arttyrý úshin Qazaqstanda 2024 jylǵy 1 qańtardan bastap Memleket basshysynyń tapsyrmasy boıynsha engizilgen arnaýly áleýmettik tólemdi (budan ári – AÁT) taǵaıyndaý sharttary týraly egjeı-tegjeıli aıtyp berdi.
AÁT taǵaıyndaý úshin 55 jasqa tolý jáne Biryńǵaı jınaqtaýshy zeınetaqy qorynda (ıýujan ári – BJZQ) keminde 7 jyl kásiptik zeınetaqy aýdarymdarynyń bolýy mindetti sharttar bolyp tabylady. Tólem zeınetkerlik jasqa deıin tólenedi. Arnaýly áleýmettik tólemderdi alý úshin eńbek jaǵdaılary zıandy jumystarmen aınalyspaýǵa tıis. Jumyskerler jeńil jumysqa aýysa alady, sodan keıin olar jalaqy men tólem alady nemese demalysqa shyǵyp, zeınetke shyqqanǵa deıin arnaýly áleýmettik tólemder alady.
BJZQ derekteri boıynsha AÁT taǵaıyndaý úshin mindetti sharttardy eskere otyryp, oǵan 2024 jyly 37 myńnan astam jumysker, 2030 jyly – 58 myńnan astam, 2035 jyly – 95 myńnan astam jumysker úmitker bola alady. Osylaısha, áleýetti tólem alýshylar sany jyl saıyn ulǵaıady.
Aldyn ala derekter boıynsha, 2024 jyly arnaýly áleýmettik tólemniń ortasha mólsheri jalpy alǵanda 208 myń teńgeden asady. Árbir jumysker úshin tólem mólsheri BJZQ-daǵy jınaqtarǵa baılanysty bolady. Bul rette jyl saıyn arnaýly áleýmettik tólem mólsheri eń tómen kúnkóris mólsheriniń ulǵaıýyna baılanysty ósedi. Aldyn ala esepteýler boıynsha 2030 jyly tólemniń ortasha mólsheri 339 myń teńgeni, al 2035 jyly – 519 myń teńgeni quraıdy.
«2024 jylǵy 11 naýryzdaǵy jaǵdaı boıynsha respýblıka boıynsha 1 156 tólem alýshyǵa 244,9 mln teńge somasyna 2 661 tólem berildi. Onyń ishinde Batys Qazaqstan oblysy boıynsha 10 alýshyǵa 2,3 mln teńge somasynda tólem júrgizildi», – dedi Svetlana Jaqypova.
Sondaı-aq, Mınıstr ótken jyldyń sońynda Úkimettiń qaýlysymen 2030 jylǵa deıingi qaýipsiz eńbek tujyrymdamasy bekitilgenin habarlady.
Qujat táýekelge baǵdarlanǵan tásil negizinde eńbekti qorǵaýdy basqarýdyń ulttyq júıesin jańǵyrtýdy, kásiptik táýekelderdi tómendetý jónindegi sharalardy ekonomıkalyq yntalandyrýdy, eńbekti qorǵaý salasyndaǵy kásiptik quzyretter men ǵylymı áleýetti damytýdy, eńbekti qorǵaý salasyndaǵy baqylaý men monıtorıńtiń tıimdiligin arttyrýdy kózdeıdi.
Tujyrymdamany iske asyrý óndiristik jaraqattaný deńgeıin, eńbekti qorǵaý salasyndaǵy buzýshylyqtar sanyn azaıtýǵa jáne eńbek jaǵdaılary zıandy jáne qaýipti jumys oryndarynyń sanyn azaıtýǵa yqpal etetin bolady.
«Qazirgi ýaqytta Kásiporyndardyń sıfrlyq kartasy quryldy, ol 2024 jylǵy 1 shildeden bastap naqty ýaqyt rejıminde eńbek jaǵdaılaryna monıtorıń júrgizýge múmkindik beredi. Monıtorıń úshin málimetterdi memlekettik eńbek ınspektorlarymen qatar kásipodaqtar da engizetin bolady. Olar úshin kásiporyndar kartasynda jeke jumys orny qurylady.
Barlyq bıznes-prosester avtomattandyrylady. Bul jumys ornyn baǵalaý, jeke qorǵanysh quraldaryn jáne basqa kepildikterdi usyný, barlyq deńgeıdegi eńbekti qorǵaý týraly bilimdi tekserý. Osy sharalardy qabyldaý nátıjesinde óndiristik jaraqattaný kórsetkishteri tómendeıdi dep kútilýde», – dedi EHÁQM basshysy.
Kezdesý sońynda Svetlana Jaqypova kásiporyn qyzmetkerleriniń barlyq suraqtaryna jaýap berdi.