Bıyl kolejderde bilim alý úshin granttar sany 45 myńǵa artyp, barlyǵy 125 myń grant bólinedi, dep habarlaıdy Almaty-akshamy.kz QR Bilim jáne ǵylym mınıstrliginiń baspasóz qyzmetine silteme jasap.
Baspasóz qyzmetiniń málimetterine qaraǵanda, halyqtyń áleýmettik osal toptarynan shyqqan balalarǵa arnaıy granttar qarastyrylǵan. Ol úshin «Bilim týraly» zańǵa ózgerister engizildi. Endi kóp balaly otbasylardan shyqqan balalarǵa granttardyń 5%, tolyq emes otbasylardan shyqqan balalarǵa 1%, múmkindikteri shekteýli balalary bar otbasylardan shyqqan balalarǵa 1% bólý kózdelgen.
Ótken jyly kolejderge qabyldaý 10 myńǵa artyp, 166 myń adamdy qurady, onyń ishinde 93 myńnan astamy memlekettik tapsyrys boıynsha (tegin oqýǵa) tústi, sonyń ishinen 67%-y kvotalyq sanattar boıynsha ótti (61,9 myń adam).
«Búgin biz tehnıkalyq mamandyqtarǵa suranystyń artyp kele jatqanyn kórip otyrmyz. Bul týraly Memleket basshysy da aıtty, sondyqtan 2025 jylǵa deıin memlekettik tapsyrystyń 70%-yn (qazir 45%) metalýrgıa, IT, qurylys, ınjenerıa jáne qyzmet kórsetý sıaqty baǵyttar quraıtyn bolady.
Búginde ákimdikter janyndaǵy arnaıy komısıalar óńirlerde suranysqa ıe mamandyqtar tizimin jasap jatyr. 30 sáýirden bastap oblystardyń jáne Nur-Sultan, Almaty jáne Shymkent qalalarynyń bilim basqarmalarynyń saıttarynda memlekettik tapsyrys kózdelgen mamandyqtar týraly aqparatpen tanysýǵa bolady», - delingen habarlamada.