Qaraqumyq jarmasy, kartop, sábiz, pıaz, qyryqqabat jáne qanttyń baǵasy tómendep jatyr.
Úkimette ótken keńeste áleýmettik mańyzy bar azyq-túlikke arnalǵan aptalyq baǵa jaǵdaıynyń qorytyndylary men baǵany turaqtandyrý sharalary talqylandy, dep habarlaıdy Almaty-akshamy.kz Úkimettiń resmı saıtyna silteme jasap.
"Osy aptada qaraqumyq jarmasynyń baǵasy 1,3%-ǵa, qant 0,8%-ǵa, pıaz 0,3%-ǵa jáne kartop 0,7%-ǵa tómendedi. Sondaı-aq jalpy úsh óńirde, ıaǵnı Almaty qalasy, Shyǵys Qazaqstan, Almaty oblystarynda kúnbaǵys maıynyń baǵasy 1,1%-ǵa tómendedi", — dedi QR SIM Saýda komıteti tóraǵasynyń mindetin atqarýshy Aıdar Ábildabekov.
Sonymen qatar, Maıly daqyldardy qaıta óńdeýshiler qaýymdastyǵynyń málimetteri boıynsha, 2022 jyldyń qazan-qarasha aılarymen salystyrǵanda, kúnbaǵys kúnjarasynyń baǵasy 30%-ǵa, al kúnbaǵys maıynyń baǵasy ótken jyldyń qarashasymen salystyrǵanda 19%-ǵa deıin tómendegen. Qazir otandyq maı zaýyttarynda óndiriletin tazartylǵan kúnbaǵys maıynyń satý baǵasy lıtrine 630-680 teńge aralyǵynda.
Mańǵystaý oblysynda baǵanyń tómendeý úrdisi jalǵasýda. Sonymen qatar osy aptada Batys Qazaqstan oblysynda oń baǵa trendi tirkeldi: - 0,1%. Munda pıazdyń (-2,9%) jáne qanttyń (-3,8%) baǵasy aıtarlyqtaı tómendedi. SQO-da baǵa turaqtandy.
Deldaldyq sqemalardy anyqtaý jónindegi óńirlik komısıalardyń jumysy óz nátıjesin kórsetýde.
"Caýda komıteti elektrondy shot-faktýralardy taldaý nátıjesinde “Shymkent” ÁKK-nen jeńildikpen zaım alǵan eki jeke kásipkerdiń deldaldyq sqemasyn anyqtady. Qosymsha deldaldyq jasaý arqyly olar bir-birine joǵary baǵamen ónim satqan. Nátıjesinde, ónim tutynýshyǵa aıtarlyqtaı qymbat baǵamen jetkizilgen. Pysyqtaý úshin barlyq materıaldar aýmaqtyq departamentterge berildi", — deıdi Aıdar Ábildabekov.
Aýyl sharýashylyǵy vıse-mınıstri Ábilqaıyr Tamabek óńirlerdegi qalyptasqan qorlardan kókónisterdi brondaýdan shyǵarý nátıjeleri men qorlardyń kólemi jaıly málimdedi. Sáýir aıynyń sońyna deıin 29,9 myń tonna kartopqa qajettilik týsa, 18 óńirde bul kókónis túrimen qamtamasyz etý kólemi 90%-dan joǵary, qalǵan eki óńirde – 69%-dy qurady. Sábizge suranys bıylǵy sáýir aıynyń sońyna deıin – 6,8 myń tonna bolsa, Qaraǵandy oblysyn (69%) qospaǵanda, qormen qamtamasyz etý 100%-dan joǵary. Eki oblys (Jambyl jáne Qyzylorda) qyryqqabatpen 50%-dan tómen, al qalǵan barlyq óńir odan joǵary deńgeıde qamtamasyz etildi. Barlyq oblystardaǵy pıaz qory 50%-dan asady.
"Biz taýarlyq ıntervensıalar jumysynyń nátıjesin kórip otyrmyz jáne bul jumysty erte shyǵatyn kókónis túrleri kelip túskenshe jalǵastyrýymyz kerek. Sonymen qatar azyq-túlik taýarlaryn forvardtyq satyp alýdy qarjylandyrýdy 70%-ǵa deıin ulǵaıta otyryp, áleýmettik mańyzy bar azyq-túlik taýarlarynyń baǵasyn turaqtandyrý tetikterin iske asyrýdyń úlgilik qaǵıdalaryn qaıta qarap, aınalym sqemalary boıynsha 30%-ǵa deıin tómendetý qajet. Osylaısha, forvardtyq satyp alýlardyń arqasynda bizde naryqtaǵy baǵanyń turaqtanýyna áser etýge múmkindik beretin ónim qorynyń kepildendirilgen kólemi bolady", — dedi Serik Jumanǵarın.