Elimizde trassalardaǵy jol belgileri jıi urlanady.
Kóbine qaýipsizdik úshin qoıylǵan qorshaýlar, jaryqqa shaǵylysatyn jáne eskertý belgileri qoldy bolady, dep habarlaıdy Almaty-akshamy.kz.
Osylaısha, ótken jyly respýblıka boıynsha 60 mln teńgeden astam shyǵyn kelipti. Kúre joldyń boıyndaǵy qaýipsizdik qorshaýlary men eskertpe belgilerge degen suranys artyp tur. Kóbine eldi mekenderdiń mańaıyndaǵylary urlanady. Mal qorasyn bitep, qurylysqa qoldanyp, áıteýir bir kádege jaratatyn kórinedi. Jolǵa jaýapty mekemeniń málimetinshe, byltyr 60 mln teńgeden asa zıan kelgen. Pysyqaılardyń bul áreketi jolaýshylardyń ómirine qaýip tóndirip otyr.
"Jol belgileriniń urlanýy joldaǵy qaýipsizdiktiń tómendeýine alyp keledi. Qarapaıym janýarlardan qorǵaıtyn qorshaýlardy jıi alyp ketip jatady. Ótken jyldyń ózinde janýarlardyń qatysýymen 109 jol-kólik oqıǵasy boldy. Sol 109 kólik oqıǵasynda 135-ten asa adam ártúrli deńgeıde jaraqat alǵan. Qatelespesem, 30-dan asa adam qaza tapqan", - deıdi «QazAvtoJol» baspasóz qyzmetiniń basshysy Adına Aınaeva.
Bıyl urlanǵan nemese tozyǵy jetkenderiniń ornyna 10 myń jańa jol belgisi ornatylady. Elimizde 25 myń shaqyrym jol toraby bar eken. Sonyń 473 myńnan asa sharshy metri oıylyp, 90 myń sharshy metri tolqyndanyp ketken.
Joldyń jyldam tozýyna qurylys sapasy men aýyr júk kólikteri áser etedi.
"Qazirgi tańda júk kólikteri 70 tonnaǵa deıin alyp júredi. Bizdiń joldar ondaıǵa eseptelmegen, bir osqa 8 tonna. Mysaly, KamAzdy alatyn bolsaq, 3 ós bar, 24 tonna alyp júrýine bolady. Ol 24 tonna – ústindegi júgi emes, mashınamen birge eseptegendegi jalpy salmaǵy. KamAzdyń ózi 14 tonna bolsa, onyń ústinen 10 tonna alyp júre alady", - «QazAvtoJol» Almaty oblysy boıynsha bas ınjeneri Berik Sarqytbaev.
Júk kólikterine qatysty ýaqyt jaǵynan da shekteýler bar. Kóktem men kúzdegi ylǵaldy aýa raıynda jáne jazdyń shilińgir ystyǵynda tańǵy saǵat 10:00-den bastap, túngi saǵat 22:00-ge deıin shekteý qoıylady. Biraq barlyq júrgizýshi bul erejeni saqtaı bermeıdi.