Bul týraly Prezıdenttiń keńesshisi Qýanyshbek Esekeev aıtty.
Qazaqstanda jasandy ıntellekt ulttyq ortalyǵy ashylatyn boldy, dep habarlaıdy Almaty-akshamy.kz
"Dostar, jaqynda biz Sıfrlyq damý, ınovasıalar jáne aeroǵarysh ónerkásibi jáne Astana Hub áriptesterimen birge Qazaqstan Respýblıkasynda jasandy ıntellektti damytý tujyrymdamasy sheńberinde derekterdi óńdeý ortalyǵy men sýperkompúter salý jobasy boıynsha jumys tobynyń otyrysyn ótkizdik. Bul platformanyń maqsaty – Qazaqstan ekonomıkasyn damytý úshin tehnologıalardy tıimdi engizý jáne AI áleýetin barynsha tolyq paıdalaný. Osy tujyrymdamanyń aıasynda AI ulttyq ortalyǵyn ashý josparlanýda", dep jazdy Qýanyshbek Esekeev Facebook-tegi paraqshasynda.
Jobanyń mısıasy - aldaǵy jyldarda Qazaqstannyń AI transformasıasyn júzege asyrý.
"AI-diń ulttyq ekonomıka men qoǵamǵa ıntegrasıasy - turaqty damýdy saqtaýdyń jáne bolashaqtyń syn-qaterlerine daıyndalýdyń qajetti sharty bolyp tabylady. Memlekettiń AI ulttyq ortalyǵyn ashý jónindegi josparlary - bilim berý, ınfraqurylymdy damytý, venchýrlyq ınvestısıalar, sondaı-aq IT sheshimderiniń eksportyn qoldaý salasyndaǵy birqatar negizgi bastamalaryn qamtıdy", dedi ol jazbasynda.
Sondaı-aq osy joba aıasynda kelesi bastamalardy qamtıtyn jol kartasy ázirlendi:
AI salasyndaǵy negizgi jobalar men zertteýlerde yntymaqtasý úshin bilim berý mekemelerin, zertteý zerthanalaryn, startaptar men tehnologıalyq mekemelerdi biriktiretin AI kampýsy;
YNOV, 01EduSystem jáne Tumo mektepteriniń ozyq tájirıbesin eskere otyryp ázirlenetin oqý baǵdarlamalaryn qoldanyp, oqýshylar men stýdentter arasynda AI mamandaryn daıarlaý;
Oqý kýrstary, sheberlik sabaqtary jáne jelilik is-sharalar arqyly AI qaýymdastyǵyn damytýǵa úles qosatyn P2P akademıasyn ashý.
"Bul bastamalar elimizde ınovasıalyq damýǵa, bilim men oqytý deńgeıin arttyrýǵa, sondaı-aq jahandyq AI ındýstrıasyndaǵy elimizdiń pozısıasyn nyǵaıtýǵa yqpal etetin turaqty AI ekojúıesin qurýǵa baǵyttalǵan", delingen jazbada.