Mundaı kólik quraldaryn bastapqy tirkeý úshin alym mólsherlemesi 200 myń teńgeni quraıdy.
Jyl basynan beri Memleket basshysynyń tapsyrmasyn oryndaý aıasynda qazaqstandyqtarǵa 2022 jylǵy 1 qyrkúıekke deıin Qazaqstanǵa ákelingen sheteldik avtokólikterdi zańdastyrýǵa múmkindik berildi.
Úkimettiń baspasóz qyzmetiniń málimetinshe, buǵan deıin elge qosalqy bólshekter retinde ákelingen kólik ıeleri resmı tirkeý qujattarynyń joqtyǵynan qıyndyqtarǵa tap boldy. Úkimet bul máseleni sheshý úshin azamattarǵa konstrýktor-avtokólikterdi zańdastyrýǵa jáne bastapqy tirkeýdi júzege asyrýǵa múmkindik beretin tıisti erejelerge ózgerister engizd, dep habarlaıdy Almaty-akshamy.kz.
Tirkelý úshin ótinish, ishki ister organdarynyń ýákiletti qyzmetkeri bergen kólik quralyn tekserip-qaraý aktisi, tehnıkalyq tekserip-qaraýdyń dıagnostıkalyq kartasy bolýy qajet.
Avtokólikterdi zańdastyrý úshin ótinimderdi Egov qyzmetteri jáne ekinshi deńgeıli bankterdiń mobıldi qosymshalary arqyly berýge bolady.
Aıta ketý kerek, Qazaqstanǵa qosalqy bólshekter túrimen ákelingen jáne kedendik tazartýdan ótpegen avtokólikti tirkeý kýáliginde menshik quqyǵyn ózgertýge tyıym salý jáne tek Qazaqstan aýmaǵynda paıdalanýǵa ruqsat berý týraly jazba kórsetiledi.
İshki ister mınıstrliginiń málimetinshe, aksıa bastalǵaly respýblıka boıynsha 107 myńnan astam kólik zańdastyrylǵan. Sonymen qatar 14 myńǵa jýyq konstrýktor-avtokólik anyqtalǵan.