Almat QODASBAEV, Almaty qalasy máslıhatynyń depýtaty:
- Qytaı men Qazaqstan arasyndaǵy vızalyq rejımdi jeńildetý, atap aıtqanda, 30 kúntizbelik kúnge deıin vızasyz rejımdi engizý máselesi birazdan beri qoǵamnyń qyzý talqysyna túsip jatyr. Halyqtyń alańdaýy zańdy. Óıtkeni Qytaı azamattarynyń ımıgrasıasy retsizdeý ekeni ras. Biraq 2022 jyldan bastap qytaı azamattary úshin vızasyz rejım qoldanysta. Degenmen halyqtyń aǵyny aıtarlyqtaı kúshti deýge kelmeıdi.
30 kúntizbelik kúnge deıin vızasyz rejımdi engizýdiń elimiz úshin utymdy tustary kóp. Týrızm jáne jappaı kásipkerlik salasyndaǵy elimizdiń áleýeti úshin úlken múmkindik. Sondaı-aq Qytaıda bizdiń qandastar da turady emes pe, olarǵa tarıhı Otanyna saıahat jasaý, dostary men týystaryna kelý ońaıyraq bolady. Zeınetker qytaılyqtar álemdegi eń belsendi týrıserdiń biri, bul Qazaqstandaǵy týrızmniń damýyna jaǵymdy áser etedi. Sonymen qatar, qandaı da bir jaǵymsyz saldarlar týyndaǵan kezde sharttyń kúshin joıý múmkindigi árqashan bar.
Qytaı qashan da Qazaqstannyń mańyzdy ekonomıkalyq seriktesteriniń biri bolyp qala beredi jáne bul - eki eldiń bıznesiniń yntymaqtastyǵyn damytýǵa jaqsy múmkindik. Bizdiń kásipkerlerimizdiń mundaı úlken naryqty paıdalanbaýy aqylǵa qonymsyz bolar edi dep sanaımyn.
Bul jaǵdaı bizdiń tólqujatymyzdyń ındeksin arttyryp, ýaqyt óte kele, qazaqstandyqtar úshin vızasyz elder tiziminiń ósý yqtımaldyǵyn arttyratyny da mańyzdy. Úshinshiden, kóptegen reıster ashylatyndyǵyn eskere otyryp, taýarlar assortımenti keńeıedi: qandaı da bir kórmege barý, mysaly, jańalyqtardy jetkizý týraly shart jasasý, jóneltýdi, tıeýdi uıymdastyrý jáne baqylaý jumystary jandana túsedi.