Borıs JAPAROV, profesor, tehnıka ǵylymynyń doktory:
Qazaqstan men Qytaı arasynda memleketaralyq otyz kúndik vızasyz tártip engiziletinine baılanysty qoǵamda neshe túrli áńgime órbýde. Birjaqty pikir basym bolyp barady. Osy rette men de óz pikirimdi bildirip ketsem deımin.
Kezinde elimizdiń Túrkıadaǵy elshisiniń keńesshisi bolǵanymda, halyqaralyq qatynasta biraz tájirıbe jınaqtaǵanym bar. Osy kúni ómir ózgerip, dúnıe jańarýda. Máselen, búkil Eýropa bir-birimen taýar aınalymyn jasaýda. Osyndaı shaqta shekarany tastaı qyp qymtap, tym-tyrs otyratyn ne jónimiz bar? Munyń ózi «halyqaralyq quqyq» degen uǵymǵa qaıshy keler edi.
Bizdiń dáýirimizdiń basynda ǵun babalarymyzdan saqtanǵan qytaılar úsh myń shaqyrymdyq «qytaı qorǵanyn» turǵyzsa, bul qamaldar búgingi kúni tarıhı eskertkish retinde ǵana baǵalanady. Aıtarym, tarıhqa ótken kúnniń ólshemimen qaramaý qajet, búginginiń talaby eskerilýi kerek. Eger, osyndaı vızasyz tártip engizilse, onyń da tejeýishi, rettegishi bar degen sóz. Bolashaqqa úmitpen qaraǵan jón.
«Qytaı azamattary qaptaıdy» dep dúrligýdiń ne mánisi bar? Ál-aýqaty órkendegen álemdik eń iri eki memleket bolsa, sonyń biri – Qytaı. Ony eskermeske bolmaıdy. Al, táýelsizdigimizdi qorǵaý degenimiz – ekonomıkamyzdy nyǵaıtý. Oılap qarasaq, ekonomıkany jasaıtyn halyq. Mundaıda ónimdi eńbek etýge júıe jasalyp, ekonomıkalyq saıasat basty ról atqarýy tıis.