Bul týraly QR Eńbek jáne halyqty áleýmettik qorǵaý birinshi vıse-mınıstri Aqmádı Sarbasov QR Prezıdenti janyndaǵy Ortalyq komýnıkasıalar qyzmetinde ótken brıfıńte habarlady.
Vıse-mınıstrdiń aıtýynsha, Qazaqstanda Eńbek kúni merekesi 2013 jyldan bastap jyl saıyn qyrkúıektiń sońǵy jeksenbisinde atap ótiledi, dep habarlaıdy Almaty-akshamy.kz Eńbek jáne halyqty áleýmettik qorǵaý mınıstrligine silteme jasap.
«Bıyl bul aıtýly kún 24 qyrkúıekke tuspa tus kelip otyr. Eńbek kúni – bul kúntizbedegi naǵyz eńbek merekesi ǵana emes, sonymen qatar jumys ómiriniń sapalyq kórsetkishi. Eńbek ómiriniń sapasy degenimiz bul turaqty jumyspen qamtý, qaýipsiz jumys ortasy, eńbekaqynyń laıyqty deńgeıi, áleýmettik kepildikter», – dedi Aqmádı Sarbasov.
Ol sondaı-aq álemniń 100-den astam memleketi Eńbek kúnin atap ótetinin jáne Jańa Zelandıa, Japonıa, Qytaı, Reseı, Belarýs sıaqty birqatar elderde bul mereke memlekettik mártebege ıe ekenin atap ótti.
Sondaı-aq, Birinshi vıse-mınıstr mereke qarsańynda Eńbek qundylyqtaryn ilgeriletý maqsatynda mynadaı is-sharalar ótkiziletinin aıtty:
- eńbek adamdary men túrli kásip ókilderi týraly derekti fılmder, taqyryptyq baǵdarlamalar, aıdarlar, habarlar serıasyn kórsetý;
- áleýmettik jelilerde keńinen taratý úshin «Eńbek adamyn» (jumysshy kásipteriniń adamdary jáne t. b.) tanymal etý jáne ilgeriletý jónindegi aqparattyq materıaldar, rolıkter, sújetter shyǵarý;
- barlyq óńirlerdi tikeleı qosý arqyly «Adal azamat – Adal eńbek» telemarafonyn ótkizý;
- barlyq bilim berý uıymdarynda «Meniń jetistigim – meniń nátıjem» taqyrybynda onlaın dárister, synyp saǵattaryn, stýdenttik pikirtalastar ótkizý;
- «Eńbek galereıasy» fotokórmeleriniń serıalaryn, sonyń ishinde kórneki jarnama quraldaryn jáne t. b. paıdalana otyryp iske qosý;
- Eńbek kúnine oraı «Meniń jetistigim – meniń nátıjem» uranymen sporttyq festıváldar ótkizý jáne t. b.
«Eńbek kúnin merekeleý aıasynda biz jyl saıyn «Eńbek joly» respýblıkalyq konkýrsyn ótkizemiz, ol nátıjeli eńbekti yntalandyrýǵa, jastar arasynda jumysshy mamandyqtaryn nasıhattaýǵa jáne jumysshy áýletterdiń kópjyldyq dástúrlerin nyǵaıtýǵa baǵyttalǵan», – dep tolyqtyrdy sózin Aqmádı Sarbasov.
Konkýrs jyl saıyn úsh nomınasıa boıynsha óńirlik jáne respýblıkalyq deńgeıde eki kezeńnen ótedi: «Úzdik eńbek áýleti» – eńbek ótili eń uzaq, marapaty eń kóp áýlet; «Jumys isteıtin jastardyń úzdik tálimgeri» – jumys ótili keminde 20 jyl, joǵary tıimdi jumys isteıtin tálimger; «Óndiris úzdik jas mamany» – jumys ótili 5 jyldan aspaıtyn óndiristiń eń belsendi jáne eńbekqor qyzmetkeri tańdalady.
«Bıyl jergilikti atqarýshy organdar konkýrsqa qatysý úshin 591 ótinish qabyldady. «Úzdik eńbek áýleti» nomınasıasy boıynsha – 143 ótinish, «Jumys isteıtin jastardyń úzdik tálimgeri» nomınasıasy boıynsha – 215 ótinish, «Óndiristiń úzdik jas mamany» nomınasıasy boıynsha – 233 ótinish qabyldandy», – dedi Aqmádı Sarbasov.
Ol sondaı-aq konkýrstyń óńirlik kezeńiniń jeńimpazdaryn oblystar men respýblıkalyq mańyzy bar qalalar ákimderiniń orynbasarlarynyń tóraǵalyǵymen komısıalar aıqyndaıtynyn jáne saltanatty túrde marapattalatynyn atap ótti. Birinshi oryn ıegerleri konkýrstyń respýblıkalyq kezeńine qatysý múmkindigine ıe bolady.
«Konkýrstyń respýblıkalyq kezeńiniń jeńimpazdaryn Eńbek mınıstrligi janyndaǵy komısıa aıqyndaıtyn bolady. Komısıa quramyna QR Parlamentiniń depýtattary, QR EHÁQM, «Atameken» UKP, «Qoǵamdyq kelisim» RMM jáne áleýmettik áriptester ókilderi kiredi», – dep habarlady vıse-mınıstr.
«Eńbek joly» baıqaýynyń laýreattary 2023 jylǵy 22 qyrkúıekte Hilton Astana qonaq úıinde Eńbek kúnine arnalǵan forým aıasynda ótetin saltanatty rásimde jarıalanady. Jeńimpazdarǵa aqshalaı sertıfıkattar men estelik syılyqtar tabys etiledi.