«Kazakh Tourism» ulttyq kompanıasy» jarıalaǵan baıqaý máresine jetti.
Joba biregeı tabıǵı landshafttary bar, dástúrimiz ben qolónerdi saqtaǵan aýyldyq aýmaqtardy anyqtaýǵa jáne damytýǵa baǵyttalǵan. Qazaqstannyń úzdik 5 týrısik aýyly qatarynda Qyzylorda oblysyndaǵy Naǵı İlıasov eldi mekeni de bar, dep habarlaıdy aqshamnews.kz.
60 jyldyq tarıhy bar Naǵı İlıasov aýyly toqsanynshy jyldary tozyp ketken edi. Eldi meken kelbetiniń adam tanymastaı ózgerýine Eńbek Eri Abzal Eralıev súbeli úles qosyp keledi. Kúrish sharýashylyǵyn shıratyp, turǵyndardy jumyspen qamtyǵan kásipker aýylda birneshe mádenı-áleýmettik ǵımaratty jańǵyrtyp, keıbirin jańadan saldy.
«Sýburqaq, saıabaq, oıyn alańy, aleıalary bar ádemi aýylǵa sońǵy jyldary týrıser de kóp keletin boldy», – deıdi turǵyndar.
Anyqbek Qaımoldaev, Naǵı İlıasov aýylynyń turǵyny: - Úlken-úlken avtobýstarmen de keledi. Syrttan kelgen aǵaıyn-týmalar, Astanadan, Almatydan kelgender aýylǵa tańǵalady. Ásirese qazirdiń ózinde jaman emes. Keshke jaqyn jarqyraıdy. Jazdygúni aınala bári gúlzar ǵoı.
Aýyldyń kósheleri tolyq asfálttalǵan. Gaz qubyry da tartylǵan.
Saǵdat Nurmaǵambetov, Naǵı İlıasov aýyldyq okrýginiń ákimi:
-Týrızmdi damytý maqsatynda aýylda bıyldan bastap biz mýzeı ashýdy qolǵa alyp jatyrmyz. Ol mýzeıde osy aýyldyń eńbekshileriniń ótken tarıhyn nasıhattaımyz sol jerde.
Aýylda jastarǵa da barlyq jaǵdaı jasalǵan. Birneshe oıyn alańy bar. Aýyldaǵy záýlim sport kesheninde 150-ge jýyq bala shynyǵady.
Respýblıkalyq jarystardan, Qazaqstan Respýblıkasynyń chempıonattarynan jáne Azıa chempıonattarynan júldegerler de jeterlik. Mamandardyń aıtýynsha, ata kásipten qol úzbeı, zaman talabyna saı damyǵan Naǵı İlıasov aýyly endi Birikken Ulttar Uıymy ótkizetin halyqaralyq baıqaýda tanystyrylady.