Premer-mınıstr Oljas Bektenovtiń tóraǵalyǵymen ótken Úkimet otyrysynda jol salasyn damytý jáne atalǵan salaǵa sıfrlyq tehnologıalardy engizý máseleleri qaraldy.
Kólik mınıstri Marat Qarabaev, sıfrlyq damý, ınovasıalar jáne aeroǵarysh ónerkásibi mınıstri Jaslan Mádıev aǵymdaǵy jaǵdaı týraly, sondaı-aq Jol aktıvteriniń sapasy ulttyq ortalyǵynyń basshysy Bolatbek Aıtbaev jáne birqatar óńir ákimderi baıandama jasady, dep habarlaıdy aqshamnews.kz.
Kólik mınıstrliginiń málimetinshe, 2024 jyly qurylys-jóndeý jumystarymen 12 myń shaqyrym jol, onyń ishinde 8 myń shaqyrym – respýblıkalyq jol jelisi, 4 myń shaqyrym – jergilikti jol qamtylǵan. Marat Qarabaev Premer-mınıstrge uzyndyǵy 7 myń shaqyrymdy quraıtyn iri avtojol jobalary aıaqtalǵanyn, strategıalyq mańyzdy nysandar: Buqtyrma sý qoımasy arqyly ótetin kópir, Shamalǵan stansasyn aınalyp ótetin jol ótpesi, Túrkistan oblysynda ornalasqan elimizdegi alǵashqy týnel paıdalanýǵa berilgenin habarlady.
Sondaı-aq Qaraǵandy – Almaty, Taldyqorǵan – Óskemen, Aqtóbe – Atyraý – Astrahan, Qaztalov – Jánibek jáne Ónege – Saıqyn sıaqty negizgi magıstraldarda jol júrý qamtamasyz etildi. Ótken jyldyń qorytyndysy boıynsha respýblıkalyq joldardyń qalypty jaǵdaıy 93%-ǵa, jergilikti joldar jaǵdaıy 89%-ǵa jetkeni atap ótildi.
Memleket basshysynyń joldardy jyl saıyn jańartý jónindegi tapsyrmasyna sáıkes 2025 jylǵa 9,5 myń shaqyrymǵa jumys josparlanǵan, sondaı-aq Aqtóbe – Ulǵaısyn, Qaraǵandy – Jezqazǵan, Atyraý – Dossor, Qyzylorda – Sekseýil, Saryaǵash, Qyzylorda, Petropavl, Rýdnyı, Shymkent jáne Túrkistan qalalaryn aınalyp ótý jobalaryn iske qosý jáne 2,5 myń shaqyrymǵa jóndeý júrgizý kózdelgen.
Jol aktıvteriniń sapasy ulttyq ortalyǵynyń basshysy Bolatbek Aıtbaev Úkimet otyrysy barysynda 2024 jyly respýblıkalyq jeli nysandaryn saraptamamen qamtý 100%-ǵa, jergilikti jeli boıynsha – 99%-ǵa jetkenin habarlady. Jol qurylysy sapasyn baǵalaý boıynsha júrgizilgen jumystardyń nátıjesinde merdiger kompanıalar óz qarajaty esebinen jalpy somasy 3,9 mlrd teńgege jumystardy qaıtadan jasady. Bıyl nysandardy 100% saraptamadan ótkizý jáne jol-qurylys materıaldarynyń 10 myń úlgisine synaq júrgizý josparlanyp otyr.
Jasandy ıntellekt tehnologıalaryn engizý boıynsha avtojoldardy dıagnostıkalaý boıynsha jumys belsendi júrgizilýde, avtomattandyrylǵan baqylaýǵa jáne elektrondyq kólik qujattaryna aýqymdy kóshý júzege asyrylýda.
Premer-mınıstr jol salasy áleýetin arttyrý jónindegi jumysty jandandyrý qajettigin atap ótti.