Vaksınanyń tıimdiligi 92%, ıaǵnı 100 adamnyń 8-i aýyryp qalýy múmkin.
Ortalyq komýnıkasıalar qyzmetinde ótken brıfıńte QR DSM sanıtarlyq-epıdemıologıalyq baqylaý komıtetiniń tóraıymy Aıjan Esmaǵambetova osyndaı málimettermen bólisti, dep habarlaıdy Almaty-akshamy.kz.
Qazaqstanda vaksınasıadan keıin 1 437 adam koronavırýs juqtyrǵan. Bul tómen deńgeı - 0,05%. Óndirýshiniń ózi vaksınanyń tıimdiligi 92% quraıdy deıdi, ıaǵnı 100 adamnyń 8-i aýyryp qalýy múmkin. «Spýtnık V» vaksınasynyń birinshi dozasynan keıin 979 adam, «Hayat-Vax»-tan keıin 35 adam jáne «QazVac»-tan keıin 8 adam aýyrǵan. Bul kórsetkishter vaksınalaýdyń tıimdiliginiń joǵary ekendigin rastaıdy. Iaǵnı, ekpe alǵan 2,9 mln adamnyń 1437-si ǵana syrqattanǵan.
Sonymen qatar, ol jańa tizimde nege vaksına alý men PTR-test mindetti bolyp tabylatynyn, al antıdeneler týraly anyqtama sekildi balama joq ekendigin túsindirdi.
«Aýyryp jazylǵan adamdar mindetti túrde PTR-test bolýy tıis sanatqa jatpaıdy, al aýyryp jazylǵandarǵa úsh aı ýaqyt beriledi. Qazir qaıta aýyrý jaǵdaılary tirkelip jatyr, klınıkalyq hattamalarǵa «qaıtalanǵan jaǵdaı» uǵymy engizildi - bul aýyrǵannan keıin 3 aı ótken soń tirkelgen jaǵdaı. Mundaı jaǵdaılar bar, sondyqtan biz alty aıdan 3 aıǵa deıin azaıttyq. Aıta keterlik jaıt, aýyrǵan adamdardy vaksınalaý úshin qarsy kórsetilimder joq. Bul qarsy kórsetkishter, dálirek aıtqanda, shekteýler alǵashqy kezeńderde engizildi jáne vaksınalardyń, álemde jetkiliksiz bolýyna baılanysty engizilgen. Bul rette aýyrmaǵandarǵa basymdyq berildi, óıtkeni buryn aýyrǵandarda az ýaqytqa bolsyn, qorǵanysy bar. Antıdenelerge test tapsyrýǵa keletin bolsaq, antıdenelerdiń qandaı tıtri qorǵaı alatyny týraly naqty dáleldengen ǵylymı málimetter joq, sondyqtan biz bul normany engizgen joqpyz», - dep túsindirdi Aıjan Esmaǵambetova.