GERMANIA elinde ár PTR-testtiń nátıjesi koronavırýstyń jańa shtamyn anyqtaý úshin taǵy bir márte tekseriletin bolady. Bul naýqasta qaýipti indettiń úndistandyq nusqasyn anyqtaý úshin qajet. Dúnıejúzilik densaýlyq saqtaý uıymy ony «delta vırýs» dep atady. Vırýstyń bul túri ózgelerge qaraǵanda tez taraıdy. Máselen, Ulybrıtanıada «delta vırýs» jańadan tirkelgen dimkás jandardyń 96%-ynda tabylsa, Germanıada 6% naýqasta anyqtalǵan. Sonyń ózinde nemis sarapshylary álden dabyl qaǵa bastady. Jergilikti bılik aımaqtaǵy epıdahýaldyń ońalǵanyna qaramastan shekteý sharalaryn jeńildetýge asyǵar emes. Keńseler men mektepterde áli de betperde rejımi saqtalǵan. Óıtkeni, sarapshylar kúzge qaraı aımaqta «delta» órship ketýi múmkin dep alańdaýly.
MALAIZIA memleketinde ekpe egý naýqanyn meılinshe údete túsý úshin Kýala-Lýmpýrdegi ulttyq stadıon da ýaqytsha vaksınalaý ortalyǵyna aınalǵan. Qazir kún saıyn turǵyndarǵa 200 myń doza salynyp jatqan kórinedi. Osylaısha jergilikti bılik shildeniń sońyna qaraı halyqtyń 10%-yn egip shyqpaq.
ÚNDİSTAN – álemdegi eń iri vaksına óndirýshilerdiń biri. Alaıda, onyń óziniń vaksınalaý boıynsha kampanıasy baıaý qarqynmen júrýde. Sondyqtan el bıligi halyqtyń eresek bóliginiń barlyǵyna koronavırýsqa qarsy tegin vaksına salýdy kózdeıtin jańa saıasatty qolǵa aldy. Iaǵnı federaldy úkimet elde óndiriletin vaksınalardyń 75%-yn satyp alyp, Úndistan shtattary arasynda bóletin bolady. Jergilikti Densaýlyq saqtaý mınıstrliginiń deregi boıynsha, vaksınalaý boıynsha jańa strategıanyń iske asyrylýynyń birinshi kúni Úndistanda 8,4 mıllıon adamǵa ekpe salynǵan. Sonyń ózinde qazirgi kezde halqynyń 5%-y ǵana paıyzy vaksına alǵan, kóptegen shtattarda vaksına áli de tapshy kórinedi.
PERÝ jerinde koronavırýstyń «Deltamen» deńgeıles jańa shtamy bas kóteripti. Mamandar osylaı dep dabyl qaqty. Buǵan deıin Dúnıejúzilik densaýlyq saqtaý uıymynyń ókilderi o syǵan deıin ǵylymı dáleldengen vaksınalardyń bári «úndi» shtamyna qarsy tura alatyndyǵyn aıtqan bolatyn. Ol úshin ekpeniń eki dozasyn da alý mindetti. Endi álgi shtamǵa da tótep bere alady dep tileıik.