Parlament Májilisiniń depýtattary «Kásibı biliktilik týraly» Qazaqstan Respýblıkasy zańynyń jobasyn jáne oǵan qatysty túzetýlerdi birinshi oqylymda maquldady.
Zań jobasyna sáıkes, Qazaqstanda kásipter retteletin jáne rettelmeıtin bolyp ekige bólinedi. Retteletinder jumysshylardyń mindetti attestasıasyn talap etedi. Bul sanatqa negizinen dárigerler, órt sóndirýshiler nemese zańgerlerdi qosa alǵanda, azamattardyń densaýlyǵy men qaýipsizdigin qamtamasyz etýge baılanysty kásipter kiredi. Memleket rettemeıtin kásipter úshin attestasıa erikti bolady, dep habarlaıdy Almaty-akshamy.kz Egemen.kz-ke silteme jasap.
«Táýelsiz atestattaýdan ótken bilim berý uıymdarynyń túlekterinde naqty mamandyq boıynsha kásiptik oqýdy aıaqtaǵanyn rastaıtyn dıplom jáne alǵan bilimin praktıkada qoldaný daǵdylaryn rastaıtyn sertıfıkat bolady. Jumys berýshilerge sertıfıkaty bar túlekterdi eńbek ótiline talaptar qoımaı-aq jumysqa qabyldaýǵa múmkindik beriledi», - dedi Eńbek jáne halyqty áleýmettik qorǵaý mınıstri Tamara Dúısenova.
Mınıstrdiń aıtýynsha, erikti negizde atestattaýdy túrli úıirmelerde, trenıńterde nemese óz betinshe oqý nátıjesinde jumysshy mamandyqtaryn ıgergen adamdar ala alady. Bul jaǵdaıda anyqtama jumysshy mamandyqtary boıynsha jumysqa ornalasý úshin negizgi qujat bola alady.
Sertıfıkattaý aqyly negizde beriledi. Jumyssyz azamattardyń qyzmetterine aqy tóleýdi memleket derbestendirilgen vaýcherler arqyly, jumys berýshi óz qyzmetkerlerin attestasıaǵa jibergen kezde nemese azamattardyń óz erkimen biliktiligin baǵalaýdan ótken kezde tóleıdi.