Sarapshylar Ýkraına men Reseıdegi jaǵdaı farmasevtıka salasyna edáýir áser etedi dep boljaýda.
Mundaı boljamdy Energyprom agenttiginiń sarapshylary jasaǵan. Naryqtaǵy taýarlar úlesiniń 85 paıyzy – ımporttyq preparattar, dep habarlaıdy Almaty-akshamy.kz Almaty.tv-ǵa silteme jasap.
Shetelden jetkiziletin dári-dármektiń úlesi Reseı, Ýkraına men Belarýske tıeseli eken. Sondyqtan Qazaqstan naryǵyna dárilerdi tasymaldaýǵa qatysty birqatar qıyndyq týyndaǵan.
«Bizde eki úlken aımaq bar. Almaty oblysy, onyń ishine Almaty qalasy da kiredi jáne Shymkent qalasy – bizdegi farmasevtıka salasynda 66 paıyzǵa ımportty tutynatyn, qabyldap alatyn aımaqtar. Farmasevtıka salasynda dárilerdiń qymbattaýy baıqalady. Qarapaıym «Hılak-Forteniń» 42 paıyzǵa ósýi degen sıaqty», - dedi qarjyger Jalǵasbek Aqbolat.
Sarapshylar aldaǵy ýaqytta preparattardy tasymaldaý boıynsha máselelerdi sheshý kerek ekenin aıtady. Dári tapshylyǵyn boldyrmaýǵa aldyn ala jasaqtalǵan turaqtandyrý qorlary da oń áserin beredi. Degenmen qala dárihanalary men turǵyndary dári tapshylyǵyn ázirge sezine qoımaǵan sıaqty.
«Endi barlyq taýar Reseı men Ýkraınadan ǵana kelmeıdi. Reseı men Ýkraınadan keletin preparattardy ózimizdiń Qazaqstannan shyǵatyn, bolmasa basqa memleketterden shyǵatyn preparattarmen almastyrýǵa bolady. Sondaı-aq bizde qazir baǵa kóterilip, dárilerdiń tapshylyǵy ondaı eshteńe bolyp jatqan joq», - dedi farmasevt Nazerke Aıtjan.
«Dáriniń baǵasynda óte qatty ózgeris joq. Biraq keıbir dárilerdiń baǵasy qymbattap jatyr. Ózgerister bar. Qazir naqty aıta almaımyn. Attaryn umytyp qaldym, sońǵy alǵan dárimde kishkene ózgeris bolǵan», «Álemde búkil baǵa kóterilip jatyr. Sebebi shıkizattyń bári Reseıde óndiriledi ǵoı. Sondyqtan kóterilip jatyr. Soǵan endi biz túsinistikpen qaraýymyz kerek», - deıdi turǵyndar.