Týrızm jáne sport mınıstrligi Sıfrlyq damý, ınovasıalar jáne aeroǵarysh ónerkásibi mınıstrligimen, «Ulttyq aqparattyq tehnologıalar» AQ-men birlesip QR azamattary men rezıdentterin qumar oıyndarǵa jáne bás tigýge qatysýdan óz betinshe shekteý jónindegi qyzmetti avtomattandyrý boıynsha jumysty aıaqtady.
Búgingi kúnnen bastap Qazaqstan azamattary, sondaı-aq QR aýmaǵynda turaqty turatyn sheteldikter eGov mobile mobıldik qosymshasy arqyly 6 aıdan 12 aıǵa deıingi merzimge ózderin qumar oıyndarǵa jáne bás tigýge qatysýyn erikti túrde shekteý týraly ótinish bere alady, dep habarlaıdy Almaty-akshamy.kz QR Týrızm jáne sport mınıstrligine silteme jasap.
Bul rásim «Oıyn bıznesi týraly» QR Zańynyń 15-1 babynda kózdelgen jáne avtomattandyrýǵa deıin tıisti tulǵalardy ózin-ózi shektegender tizimine qosý 8 jumys kúni ishinde qaǵaz formatta júzege asyryldy.
Jańa qyzmet ótinishterdi óńdeý merzimin edáýir qysqartady jáne qumar oıyndarǵa qatysýdan ózin-ózi shekteý rásimin jeńildetedi. Bul barlyq azamattarǵa, eń aldymen qumar oıyndarmen shekten tys áýestenetin tulǵalarǵa barlyq lısenzıalanǵan oıyn mekemeleri men býkmekerlik keńselerdiń zańdy saıttaryna kirýge lezde tosqaýyl qoıýǵa múmkindik beredi.
Ózin qumar oıyndarǵa qatysýdan shekteý úshin QR azamatyna nemese rezıdentine óz telefonyna eGov mobile mobıldi qosymshasyn júktep, elektrondyq sıfrlyq qoltańbany jasap alý kerek.
Ótinish ESQ men ótinimge qol qoıý arqyly onlaın beriledi. Ótinish bergennen keıin servıs ótinishti dereý tirkeıdi jáne ótinish bergen tulǵa ótinishti qaıtaryp alý quqyǵynsyz 6 aıdan 1 jylǵa deıingi merzimge qumar oıyndarǵa jáne bás tigýge qatysýdan shektelgen adamdardyń tizimine (budan ári – tizim) engiziledi. Bul rette, qumar oıyndarǵa qatysýdy shekteý jáne bás tigý merzimi aıaqtalǵanǵa deıin shekteýdi uzartý týraly ótinish berýge bolady.
QR «Oıyn bıznesi týraly» Zańyna sáıkes tizimge engen tulǵalar týraly málimetter qupıa bolyp tabylady. Tıisinshe, mundaı málimetter tek TSM-niń laýazymdy tulǵalaryna, sondaı-aq qumar oıynǵa qatysqysy keletin adamdardyń tizimde bolý derekterin JSN engizý arqyly jekelegen suraý salý úshin lısenzıalanǵan oıyn bıznesi uıymdastyrýshylaryna ǵana qoljetimdi.
Osylaısha, oıyn bıznesi sýbektileriniń árbir suraý salýy tizimde turǵan adamdardyń ózge de jeke derekterin ashpaı-aq tek qana JSN derektemeleri boıynsha jeke óńdeletin bolady. Oıyn bıznesi sýbektileriniń tizimniń tolyq nusqasyna qol jetkize almaıdy.
Qumar oıyndarǵa jáne bás tigýge qatysýdan bas tartqysy keletin tulǵalar ótinishti derbes ESQ-ny paıdalana otyryp, ózdigimen berýge tıis ekenine nazar aýdaramyz. Ótinishti úshinshi tulǵalardyń bere almaıdy.
Paıdalanýshylarǵa yńǵaıly bolý úshin «Ulttyq aqparattyq tehnologıalar» AQ-men birlesip egjeı-tegjeıli beıne nusqaýlyq ázirlendi, ol «eGov mobile» mobıldi qosymshasynda jáne TSM-ń ınternet-resýrsynda https://youtube.com/shorts/_Nq7Zb_M-4Y?feature=share siltemesi boıynsha qoljetimdi.
Sonymen qatar sıfrlyq servıspen qatar QR azamattary men rezıdentteri úshin Zańnyń 15-1-babyna sáıkes oıyn bıznesin uıymdastyrýshylary arqyly qumar oıyndarǵa jáne bás tigýge qatysýdan ózin-ózi shekteý týraly jazbasha ótinish (qaǵaz nysanda) berý múmkindigi saqtalady.