Bıyl Naýryz merekesi elimizde erekshe toılanyp jatyr.
Jańasha mánge ıe bolǵan merekedegi meıirim kúni İİM M.Esbolatov atyndaǵy Almaty akademıasynda da ózgeshe atalyp ótti, dep habarlaıdy Almaty-akshamy.kz Polisia.kz-ke silteme jasap.
Atap aıtqanda, taǵdyrdyń aýyrtpalyǵyna ushyraǵan balalarǵa kómek qolyn sozyp júrgen “Meniń Armanym” korporotıvtik qorynyń ótinishimen 11 jastaǵy Nurasyl esimdi jetkinshek akademıaǵa kelip, irgeli oqý ornynyń tynys-tirshiligimen tanysty. “Meniń Armanym” qorynyń ondaǵy maqsaty – bolashaqta polısıa qyzmetkeri bolýdy armandaıtyn Nurasyldy akademıa ómirimen tanystyrý.
Armanshyl balany úlken izetpen qarsy alǵan akademıa basshylyǵy oǵan zor múmkindik týdyrdy. Nurasyl akademıadaǵy mýzeıdiń jádigerlerin tamashalap, sport zaldaǵy túrli jattyǵýlardy kórip, rıza boldy. Sondaı-aq ol polısıa qyzmetkerleri qoldanatyn qarýlarmen de tanysty. Aýyr dertpen kúresip júrgen Nurasyldyń qalaýyn oryndap, meıirimdilik tanytqan akademıa basshylyǵy estelikke syılyq usynyp, ony sheksiz qýanyshqa bóledi. Kýrsanttardyń ómirimen tanysqan jetkinshek talpynsa ómirdegi armanynyń oryndalatynyna senimmen attandy.