4 qazan – Qazaqstan Qarýly Kúshteriniń Zymyran áskerleri men artılerıa kúni.
Qorǵanys mınıstriniń dırektıvasymen 2000 jyldyń dál osy kúni Zymyran áskerleri men artılerıa qolbasshylyǵynyń basqarmasy qurylǵan bolatyn, dep habarlaıdy Almaty-akshamy.kz.
Zymyran áskerleri men artılerıa Qurlyq áskerleriniń quramyna kiredi. Qarýly Kúshterdiń damý kezeńinde áskerler qolbasshylyǵynyń basqarmasy, quralymdar men bólimderdiń qurylymy únemi jetildirilip keledi.
Artılerıa men zymyran bólimsheleri barlyq jalpy áskerı, onyń ishinde halyqaralyq deńgeıdegi oqý-jattyǵýlarǵa úzdiksiz qatysady. Áskerı qyzmetshiler Armıalyq halyqaralyq oıyndary aıasynda ótken «Artılerıadan oq atý sheberleri» konkýrsynda tabysty óner kórsetip, elimizdiń artıllerısteri jattyǵýdyń joǵary deńgeıin kórsete otyryp, jeńis tuǵyrynan kórinip keledi.
Atalǵan áskerler túrleriniń kadr ofıserlerin Qurlyq áskerleriniń Áskerı ınstıtýty men Tuńǵysh Prezıdenti – Elbasy atyndaǵy Ulttyq qorǵanys ýnıversıteti, sonymen qatar Sankt-Peterbýrgtaǵy Mıhaılovsk áskerı artılerıalyq akademıasy daıarlaıdy. Odan bólek, Almaty jáne Qaraǵandy polıtehnıkalyq ýnıversıtetteriniń áskerı kafedralaryn bitirgen túlekter jyl saıyn áskerı-oqytylǵan rezerv qataryn tolyqtyrýda.
Zymyran áskerleri men artılerıanyń áskerı bólimderi men bólimsheleri kez-kelgen urys jaǵdaıynda jaýdy atyspen jeńýdiń tıimdi quraly bolyp tabylatyn zymyrandyq jáne artılerıalyq júıelerdiń barlyq qajetti túrlerimen jabdyqtalǵan.
Qarý-jaraq pen áskerı tehnıkanyń qolda bar úlgilerin jańǵyrtý jáne jańa úlgilerin satyp alý josparly túrde júzege asyrylýda. Atap aıtqanda, áskerlerdi artılerıalyq optıkalyq jáne radıolokasıalyq barlaý quraldarymen qaıta jaraqtandyrýǵa, artılerıanyń atysyn topogeodezıalyq, meteorologıalyq jáne balıstıkalyq qamtamasyz etýge erekshe nazar aýdarylady. Jańa optıkalyq-elektrondyq barlaý júıelerin, meteorologıalyq, balıstıkalyq jáne topogeodezıalyq keshenderdi engizý jalǵasýda. Artılerıadan oq atýdy basqarýdyń avtomattandyrylǵan júıesin qalyptastyrý jumysy belsendi júrgizilýde.