Daýys berý keshki 20.00-ge deıin jalǵasady.
aqshamnews.kz saıty kúni boıy óz oqyrmanyn referendýmnyń barysymen habardar etedi.
Referendým búlleteninde "Siz Qazaqstanda atom elektr stansasynyń salynýymen kelisesiz be?" degen suraq bar, al saılaýshylar "Iá, kelisemin" nemese "Joq, kelispeımin" dep tańdaý jasaı alady. Saılaýshy óz tańdaýyn belgilegen jaýap nusqasynyń janyndaǵy bos sharshyǵa kez kelgen belgini qoıý arqyly kórsetedi.
Resmı aqparatqa sáıkes, 6 qazanda elimizdegi saılaý ýchaskeleriniń kópshiligi saǵat 7:00-de ashylyp, keshki saǵat 20:00-ge deıin jumys isteıdi. Daýys berý tizimine 12,3 mıllıonǵa jýyq qazaqstandyq engizilgen.
Referendýmǵa 30 shet memleket pen tórt halyqaralyq uıymnan (Táýelsiz Memleketter Dostastyǵy, Shanhaı yntymaqtastyq uıymy, Túrki memleketteri uıymy, Azıadaǵy ózara is-qımyl jáne senim sharalary jónindegi keńes) 177 baıqaýshy qatysady. Sondaı-aq, 14 memlekettiń saılaý organdarynyń ókilderi, onyń ishinde Ázirbaıjan, Belarýs, Tájikstan jáne Ózbekstan ortalyq saılaý organdarynyń basshylary daýys berý barysyn baqylap otyr.
Qazaqstan Respýblıkasy Syrtqy ister mınıstrliginiń málimetinshe, 37 elden 200 sheteldik jýrnalıs akkredıttelip, referendým barysyn baqylap, aqparat taratýda.
Elimizde barlyǵy 10 323 saılaý ýchaskesi jumys isteýde, sondaı-aq, 59 elde ornalasqan sheteldik mekemelerde 74 saılaý ýchaskesi ashylǵan. Referendým nátıjeleri daýys berý kúninen bastap jeti kún ishinde buqaralyq aqparat quraldarynda jarıalanady.