Bul naýqanǵa Qazaqstan Respýblıkasynyń kez kelgen azamaty qatysa alady.
«Ádildik joly» respýblıkalyq qoǵamdyq birlestigi Sybaılas jemqorlyqqa qarsy agenttikpen birlesip, el boıynsha avtokólik joldary salasynda «Ádildikti talap et!» atty aýqymdy naýqandy bastady, dep habarlaıdy Almaty-akshamy.kz Elorda.info saıtyna silteme jasap.
Naýqan barysynda avtojol salasy máseleleri qozǵalyp, joldardy salý, jóndeý jáne kútip ustaý kezinde jemqorlyq táýekelderin anyqtaýǵa basa nazar aýdarylatyn bolady.
Memleket avtojol salasyna úlken qarajat bóletinine qaramastan, ókinishke qaraı, ol únemi qoǵam tarapynan synǵa ushyraýda. Sapasyz joldardyń saldarynan kóptegen jol-kólik oqıǵalary oryn aldy.
«Bıyl respýblıka boıynsha 11 myńnan astam shaqyrym jolǵa ártúrli jóndeý jumystary júrgiziledi. Buǵan 600 mıllıard teńgeden astam qarjy bólindi. Al jol jóndeýge bólingen qarajattyń 44 paıyzyna memlekettik satyp alý qorytyndysy jasalǵan joq. Avtojoldardy salý jobalarynyń barlyq kezeńderi jemqorlyq táýekelderine beıim. Tek memleket pen azamattardyń birlesken kúshimen ǵana, qoǵamdy barynsha jemqorlyqqa qarsy kúreste jumyldyra otyra, bul zulymdyqqa tótep bere alamyz. Azamattar naýqanǵa Adildik.kz veb-saıty arqyly qosylyp, 1463 Call center boıynsha Qazaqstan avtojoldaryn salý, jóndeý jáne kútip ustaý salasyndaǵy jemqorlyq týraly aqparatty 15 tamyzdan bastap habarlaı alady. Beıjaı qaramaıtyn barlyq azamattardy atalmysh naýqanǵa qosylyp, belsendilik tanytýǵa shaqyramyz», – deıdi «Ádildik joly» RQB-niń Nur-Sultan qalasyndaǵy fılıaly basshysy D.Quljambekov.