Alıment tóleýden "qashyp" júrgenderdiń arasynda eki-úsh balaly ata-analar da bar
QR Ádilet mınıstri Qanat Mýsın elimizde balasyna alıment tóleýden jaltaryp júrgen ana-analardyń sanyn atady.
«Shamamen 8 myń ata-ana alıment tólemeıdi. Olardyń ekiden, úshten balalary bar. Iaǵnı, san eselep ósedi. Muny az dep aıta almaımyn, óte kóp. Sebebi de kóp, boryshkerdiń shynymen aqshasynyń bolmaýy múmkin. Alıment tólegisi kelmeı, odan jaltarýy da yqtımal. Osy maqsatta túrli qýlyqqa baryp, jumys oryndaryn kórsetpeıdi. Jalaqylaryn tómen kórsetip, tipti sot oryndaýshylarynan jaltaryp ta júredi», - dedi mınıstr búgin Májilistegi Úkimet saǵatynan keıin BAQ ókilderiniń saýalyna oraı.
Onyń atap ótýinshe, memleket barlyq tásilder arqyly bul problemany sheshýge tyrysyp keledi. Máselen, osyndaı ispen aınalysatyn sot oryndaýshylary yntalandyrylyp otyrady. Árbir alıment isi boıynsha sot oryndaýshysyna memleket jylyna 15 aılyq eseptik kórsetkish kóleminde qarjy tóleıdi. Bul iste sot oryndaýshylaryna da qatań talap qoıylady. Eger sot oryndaýshysy alımentti óndirip alý boıynsha naqty atqarýshylyq is-qımyl jasamasa, onda lısenzıasynan aıyrylady. Sonymen qatar mınıstr tólem jasaýdan jaltaryp, túrli jol izdeıtin boryshkerlerdiń de bar ekenin jasyrmady.
«Sot oryndaýshylary olarǵa barynsha kedergi keltirýge tyrysady. Biraq, keıde oǵan múmkin bolsa, endi birde ondaı múmkindik bolmaı qalady. Degenmen, tólem jasamaıtyndar anyqtalyp, jumysqa ornalastyrylady. Ótken jyly biz 2,6 myńǵa jýyq adamdy jumysqa ornalastyrdyq. Olar jalaqy alyp, alımentterin tóledi. Alıment tólemeıtinder tek bizdiń ǵana problemamyz emes. Ol barlyq jerde, onyń ishinde Qazaqstanda da boldy ári bola da beredi», - dedi Qanat Mýsın.