Elimizde 31 myńnan astam azamat jeńil ári tez tabysqa kenelem dep túrli qarjy pıramıdalarynyń aldaýyna túsip qalǵan. Bul týraly QR İİM tergeý departamentiniń basshysy Sanjar Ádilov málim etti, dep habarlaıdy Almaty-akshamy.kz.
«Azamattardyń aqshalaı qarajaty men múlkin zańsyz ıelený maqsatynda qurylǵan qarjy pıramıdalary, sońǵy jyldary keń taralǵan qylmys túrine jatady. Qarjy pıramıdalarynyń kóbeıýine jábirlenýshiler sanynyń kúrt ósýi áser etti. Al olardan kelgen jalpy zalaldyń mólsheri mıllıardtardy qurady. Búginde 31 myńnan astam qazaqstandyq azamat qarjy pıramıdalarynyń qurbany boldy. Shyǵyn kólemi 54 mlrd teńgeden asyp túsedi», - dedi Sanjar Ádilov QR İİM-de onlaın ótken baspasóz máslıhatynda.
Onyń aıtýynsha, qarjy pıramıdalary azamattardy aldaýdyń túrli ádisin qoldanady.
«Alaıaqtar oılap tapqan ádisterdiń kóbisi azamattardy jeńil aqsha tabýǵa shaqyrady. Sonyń biri - ınvestısıa quıý. Iaǵnı, qarjy pıramıdalary ózderin naryqta tabysty kompanıa retinde kórsetip, qyzmetterin usynady. Jáne azamattardy tartý úshin túrli ınvestısıalyq jobalardy oılap tabady. Sondaı-aq, qarjy pıramıdalary shaǵyn qarjylyq uıym retinde, býkmekerlik kontor jáne tutynýshylar kooperatıviniń atyn jamylyp ta jumys isteıdi. Odan bólek, olardyń basty quraly áleýmettik jeli. Iaǵnı, jeńil ári onlaın tabys tabýǵa shaqyrady. Ol úshin messendjerlerdiń múmkindigin paılanady», - deıdi ol.