Jyl saıyn qaterli isikpen aýyratyn 36 myńǵa jýyq naýqas anyqtalady.
Búgingi tańda dıspanserlik esepte 190 myńnan astam qazaqstandyq tur.
Jyl saıyn onkologıalyq aýrýlardan shamamen 14 myń adam kóz jumady, dep habarlaıdy Almaty-akshamy.kz
4 aqpanda Halyqaralyq obyrǵa qarsy odaqtyń (UICC) bastamasymen Dúnıejúzilik obyrǵa qarsy kúres kúni atap ótiledi.
Jyl saıyn elimizde qaterli isiktiń 36 myńǵa jýyq jańa oqıǵalar tirkeledi. Búgingi tańda dıspanserlik esepte 190 myńnan astam qazaqstandyq tur. Jyl saıyn onkologıalyq aýrýlardan shamamen 14 myń adam kóz jumady.
Qazaqstanda qaterli isiktiń eń kóp taraǵan túrleri: sút bezi obyry, ókpe obyry, asqazan obyry, jatyr moıny obyry jáne kolorektaldy obyry. Qazaqstanda onkologıalyq kómekti jetildirý Qazaqstan Respýblıkasynyń Densaýlyq saqtaý salasyn damytýdyń 2020-2025 jyldarǵa arnalǵan memlekettik baǵdarlamasynyń jáne Qazaqstan Respýblıkasynda onkologıalyq aýrýlarmen kúres jónindegi 2018-2022 jyldarǵa arnalǵan Keshendi jospardyń mindetterin iske asyrý sheńberinde júzege asyrylady.
«2019 jyly Pavlodar qalasynda joǵary tehnologıalyq jelilik údetkishi bar jańa onkologıalyq ortalyq iske qosyldy, qazirgi ýaqytta apparatta sáýlelik terapıa qyzmetteri kórsetiledi. 2020 jyly jańa Mańǵystaý oblystyq ortalyǵy iske qosyldy, qazirgi ýaqytta onda zamanaýı jabdyqtar (KT, MRT, jelilik údetkish) ornatyldy. 2019 jyldan bastap UǴMO mamandandyrylǵan kómek kórsetedi, qazirgi ýaqytta Proton ortalyǵyn jáne basqa da joǵary tehnologıalyq bólimshelerdi uıymdastyrý boıynsha jumystar jalǵasýda. 2021 jyly Óskemen qalasynda (SHQO) jelilik údetkish iske qosyldy. Sondaı-aq 2021 jyldyń qazan aıynan bastap QazOjRǴZI bazasynda Tomoterapıa ortalyǵynyń jumys isteýi bastaldy.Respýblıkalyq uıymdarda qashyqtyqtan joǵary tehnologıalyq sáýlelik terapıa (Tomoterapıa, stereotaksıs, IMRT, IGRT), ıntraoperasıalyq sáýlelik terapıa, aǵzalar men tinderdiń bıotransplantasıasy, az ınvazıvti hırýrgıa damyp, pasıentterge usynylady. Klınıkalyq praktıkada ártúrli bıologıalyq markerlerdi (ımmýnogıstohımıa, molekýlárlyq-genetıkalyq zertteýler) aıqyndaý boıynsha qyzmetter usynylady, bul onkologıalyq naýqastardy derbestendirilgen emdeýdi júrgizýge múmkindik beredi jáne Qİ molekýlárlyq-bıologıalyq erekshelikterin neǵurlym egjeı-tegjeıli zerdeleý boıynsha múmkindikterdi keńeıtedi», – dedi QR DSM shtattan tys bas onkology, «Qazaq onkologıa jáne radıologıa ǵylymı-zertteý ınstıtýty» Aksıonerlik qoǵamynyń basqarma tóraıymy, m.ǵ.d., profesor, QR UǴA akademıgi Dılára Qaıdarova.
Keshendi josparda Nur-Sultan, Semeı, Shymkent jáne Aqtóbe oblystarynda qosymsha PET-ortalyqtaryn ashý josparlanǵan. 2021 jyldyń sáýir aıynda Semeı qalasynda radıoızotopty dıagnostıka men radıonýklıdti terapıany qoldana otyryp, Qazaqstandaǵy alǵashqy ıadrolyq medısına ortalyǵy ashyldy. Onda radıoıod terapıasy júrgiziledi.
Qazaqstanda jatyr moıny obyryn, sút bezi qaterli isigin jáne tik ishektiń qaterli isigin erte anyqtaý boıynsha ulttyq skrınıngtik baǵdarlamalar júrgiziledi. Qazaqstan azamattaryna onkologıalyq aýrýlardy dıagnostıkalaý jáne emdeý tegin medısınalyq kómektiń kepildendirilgen kólemine (GOBMP) kiredi jáne memlekettik búdjetten tolyǵymen qamtylǵan.
Qazaqstan halqy úshin onkologıalyq skrınıngtiń 3 túri tegin júrgiziledi:
1) sút bezi qaterli isiginiń skrınıngi
2) jatyr moıny qaterli isiginiń skrınıngi
3) kolorektaldy qaterli isik skrınıngi
QazOjRǴZI qaterli isikti zertteý boıynsha halyqaralyq yntymaqtastyqty belsendi damytýda: qazirgi ýaqytta TMD jáne Eýropanyń jetekshi ǵylymı ortalyqtarymen ózara is-qımyl jáne ózara ǵylymı yntymaqtastyq týraly kelisimderge qol qoıyldy. QazOjRǴZI halyqaralyq klınıkalyq zertteýlerge belsendi qatysady. Instıtýtta únemi halyqaralyq konferensıalar, sheberlik-saǵattar, sheteldik mamandarmen tájirıbe almasý ótkizilip turady.
BAQ ókilderimen ótken onlaın baspasóz máslıhatyna qaterli isikpen aýyryp, otandyq dárigerlerdiń kómegimen qulan-taza jazylyp shyqqan azamat, Qazaqstannyń qurmetti ushqyshy Rahman Ospanov azamattardy der kezinde tekserilýge jáne emdelýge keńes berdi.